Şagirdlərimizin həyatının ən unudulmaz və tarixi anları
Nəqliyyat, Rabitə və Yüksək Texnologiyalar Nazirliyi, Beynəlxalq Telekommunikasiya İttifaqı, Azərbaycanda İxracın və İnvestisiyaların Təşviqi Fondu və Azərbaycan Respublikası Sahibkarlar Təşkilatları Milli Konfederasiyasının dəstəyi ilə keçirilən “Bakutel-2018” sərgisində Prezident İlham Əliyev məşhur futbolçu, fransız Robert Pireslə görüşdü. Pires 1998-ci ildə dünya çempionu, 2000-ci ildə isə Avropa çempionu olub. “Arsenal” komandasının liderlərindən olan Pires, həmçinin İngiltərə kubokunun qalibi və İngiltərə çempionudur. FİFA-nın 2000-ci il reytinqinə görə o, dünyanın ən yaxşı 100 futbolçusundan biri olub. O həmçinin Bakıda keçiriləcək Avroliqa finalının səfiridir.
Qeyd edək ki, sərgidə ilk dəfə olaraq alman alimlərinin ixtirası olan ultra-modern texnologiyası əsasında “RoboKeeper” təqdim olunur. Bu, dünyanın ən sürətli qapıçısı hesab edilir. Hətta bir çox məşhur dünya futbol ulduzları da bu qapıçını məğlub edə bilmir. Robert Pires Prezident İlham Əliyevə Avroliqanın rəsmi topunu təqdim etdi.
Sevindirinci haldır ki, belə mötəbər tədbirdə futbol üzrə qızlar arasında Azərbaycan çempionatının Səbail rayonu üzrə qalibi olan məktəbimizin futbol komandasının üzvləri də iştirak ediblər. Onlara Prezident İlham Əliyev və Birinci Vitse-Prezident Mehriban Əliyeva ilə görüşmək qisməti nəsib olub. Dövlət başçısı ilə keçən səmimi görüş, yəgin ki, şagirdlərimizin həyatının ən unudulmaz və tarixi anları kimi onların xatirindən ömür boyu silinməyəcək.
