“Bilik günü”nü qeyd edirik!
Məktəbimizdə təşkil edilən “Bilik günü” nə həsr olunmuş tədbir öz xoş ovqatı və rəngarəngliyi ilə yəqin ki, birincilərin və onların valideynlərinin yaddaşında əbədi qalacaq.
Tədbirdə birincilər, onbirincilər, valideynlər, Səbail RİH – nin şöbə müdiri İsrafil Kərimov, məktəbimizin məzunu Bəhram Bağırzadə, eləcə də, builki məzunumuz ali məktəbə qəbul imtahanlarında 693 bal toplayaraq Ali Neft Akademiyasına daxil olan Rəhimə Abbasova iştirak edirdilər.
Azərbaycan Respublikasının Dövlət Himninin səslənməsi ilə başlayan tədbirdə məktəbin direktoru Ceyran Kuliyeva valideynləri, şagirdləri təbrik edərək, 2017/2018–ci tədris ilində məktəbin qazandığı uğurlar barədə məlumat verdi, yüksək bal toplayaraq tələbə adı qazanan şagirdlərə uğurlar dilədi. Direktor öz çıxışında əsası Ulu Öndər tərəfindən qoyulan və bu gün də, Azərbaycan Respublikasının Prezidenti cənab İlham Əliyev, eləcə də, I vitse Prezident Mehriban xanım Əliyeva tərəfindən ölkəmizdə təhsilə olan xüsusi diqqət və qayğıdan söz açdı. Təhsil Nazirliyi tərəfindən "Təhsildə keyfiyyət ili”ndə əldə olunmuş müsbət dinamikanın qorunub saxlanılması və mahiyyətcə inkişafyönlü tədbirlərin 2018-2019-cu dərs ilində də davam etdirilməsindən söz açan direktor bu tədris ilində biz müəllimlərin, eləcə də, valideyn və şagirdlərin məsuliyyətinin daha da artırılmasının vacibliyini xüsusi olaraq qeyd etdi, Ceyran Kuliyeva təhsil sahəsində aparılan islahatların, təhsil infrastrukturunun müasir tələblər səviyyəsində qurulmasının, təhsilin məzmunundakı köklü dəyişikliklərin cəmiyyətimizin və xalqımızın gələcək taleyində mühüm rol oynayacağına əminliyini bildirdi.
Tədbirdə çıxış edən Səbail rayon İcra Hakimiyyəti Başçısının şöbə müdiri İsrafil Kərimov və məktəbimizin məzunu Bəhram Bağırzadə yeni dərs ilinin başlanması münasibəti ilə kollektivi- birinciləri və onbrinciləri təbrik edərək onlara xoş arzularını çatdırdılar. Məzun Rəhimə Abbasova isə əldə etdiyi uğur və nailiyyətlərə görə məktəbə və müəllimlərə borclu olduğunu söyləməklə yanaşı, birincilərin valideynlərinə məktəb seçimində doğru seçim etdiklərini bildirdi.
İlk zəngin sədaları altında birincilər sinif otaqlarına üz tutdular.
Beləcə, məktəbimizdə 2018/2019-cu tədris ili başlamış oldu.
Bütün kollektivə yüksək məsuliyyət, uğur və nailiyyətlər arzulayırıq!
