Xoş anları yaşadanlara minnətdarıq
Məktəbdə silsilə bilik yarışmalarından ən arzuolunanı, ən qızğını və coşquya səbəb olanı - “Nə? Harada? Nə zaman?“ intellektual yarışının 2017-ci ildə son mücadiləsi, mübarizəsi keçirildi. Hər zaman olduğu kimi bu oyunda da mücadilə müəllimlərlə öz yetirmələri – şagirdlər arasında gedirdi. “Bilicilər” komandası bu yarışmalarda artıq bərkdən-boşdan çıxmış 11f sinif şagirdlərindən ibarət idi. Dilbər, Nigar, İbrahim, Səriyyə, Anjelika, Fazil və komandanın sadiq kapitanı Heydər Səfərov masa arxasında çox iddialı görünürdülər. “Bilicilər” qarşısında Rzayeva Xanım (Azərbaycan dili),Rzayeva Sevda(rus dili), Adıgözəlova Nərminə (kimya), Nəsibova Samirə,Tağıyeva Sevil (tarix), Kazımzadə Fəridə (coğrafiya), Qarayeva Sevil (fizika), Nadirova Sevda (biologiya) tərəfindən ünvanlanmış düşündürücü,məntiqə əsaslanan sualları və oyunun formatına uyğun olaraq 3 sualdan ibarət “Superblits”i cavablandırmaq, “Qara qutu” da “gizlədilmiş” əşyanı tapmaq, təqdim olunmuş şəklin mənasını açıqlamaq, saniyələr ərzində “Seytnot”dakı suala cavab vermək kimi bir vəzifə dururdu. “Qonaq” bölməsində direktor müavini Aida xanım Tağıyevanın iştirak etməsi və “Bilicilər”ə qarşı oynaması gözlənilməz olsa da,tədbirə xüsusi rəng qatmış oldu. Gərgin keçən və qaydalara ciddi əməl olunan yarışmadan Səfərov Heydərin kapitan olduğu “Bilicilər” komandası qalib çıxdı. “Oyunu izləyən onlarla şagird və müəllim qarşısında duruş gətirən komanda hər cür alqışa və tərifə layiqdir” – dedi Ceyran xanım. Fərhadın “bilici” İbrahimlə birgə ifa etdiyi mahnı gərginliyi aradan qaldırmaqla komandaya dəstək vermiş oldu. Sonda “Ən fəal oyunçu” və “Ən yaxşı sual” nominasiyalarının qalibləri xatirə hədiyyələri ilə mükafatlandırıldı. Bu yarışma bayram ab-havası, bayram əhval-ruhiyyəsi ilə yadda qaldı. Kollektivə bu xoş saatları bəxş edən 11f sinif şagirdlərinin hər birinə və bu tədbirin təşkilatçısı Təranə Rzayevaya minnətdarıq.
