Hüseyn Cavidin ev muzeyində növbəti dərs
Azərbaycan ədəbiyyatında ilk mənzum faciə və dramların müəllifi, ədəbiyyatımızın söz və fikir zadəganı Hüseyn Cavidin anadan olmasının 135 illiyi münasibəti ilə məktəbimizin 11”A” sinif şagirdləri ədəbiyyat fənnindən növbəti mövzunu dramaturqun ev muzeyində keçdilər.
Muzeyin əməkdaşları ilə birgə təşkil olunan bu dərsdə Hüseyn Cavidin həyat və yaradıcığı haqqında şagirdlərin əldə etdiyi məlumatlar dinlənildi. Bütün həyatı, yaradıcılığı boyu öz sənət idealına xəyanət etməyən, onu satmayan gözəllik və sevgi şairi Cavidin şagirdlərin ifasında səslənən şeirləri dahi sənətkarın yaradıcılığına olan hüsn-rəğbətdən irəli gəldi. Muzey əməkdaşları tərəfindən eksponatlarla tanış edilən şagirdlərdə Hüseyn Cavid şəxsiyyətinə olan ehtiram bir daha artmış oldu.
