Şəhidlərimizin məzarı hər birimiz üçün müqəddəs ziyarətgahdır!
Şəhid məzunlarımız Fərid Ələkbərov və Faiq Həsənovun doğum tarixləri yay tətili günlərinə təsadüf edəcəyindən tədris ilinin sonunda məktəbin rəhbərliyi bir qrup şagirdlərlə Fəxri Xiyabanda uyuyan şəhidlərimizi ziyarət etdi.
Müqəddəs amal uğrunda şəhadətə yüksələn oğullarımızın ruhunun rahatlıq tapdığı Vətən torpağında, Fəxri Şəhidlər Xiyabanında hər bir şəhid məzarını təəssüf, göz yaşları, eyni zamanda bir az da qürur hissi ilə izləyən şagird sükutunu direktor Ceyran Kuliyevanın "Şəhidlərimizin məzarı hər birimiz üçün müqəddəs ziyarətgahdır!" ifadəsi pozdu.
Məktəbin riyaziyyat müəllimi Nüşabə Ağayeva da tarixi qəhrəmanlıq ənənələrini qoruyan oğullarımızın döyüş meydanında düşməni 44 günə darmadağın edərək tarix yazmasından, Ali Baş Komandanın rəhbərliyi altında xalqın dəstəyindən güc alan mərd oğullarımızın qısa müddət ərzində tarixi torpaqlarımızı işğaldan azad etməsindən söz açdı.
Ziyarəti Ceyran Kuliyeva –“Qurban verdikləri bir canla onlarla bəlkə də yüzlərlə insanın canını xilas edən oğullarımıza hər zaman borcluyuq. Xalqımız Vətən torpaqlarının azadlığı uğrunda canını qurban vermiş hər bir şəhidimizin xatirəsini daim uca tutur. Şəhidlər ölməzlər, onlar daim ürəklərdə, yaddaşlarda yaşayacaqlar. Böyük Zəfəri və Böyük Qələbəni xalqımıza bəxş edən şəhidlərimizi ən səmimi, ən ülvi duyğularla yad edirik”-fikri ilə bitirdi.
