2020-2021 tədris ili başladı
Xüsusi zövqlə bəzədilmiş, musiqili, haylı- küylü məktəblər bu dəfə sevimli şagirdlərini, həsrətlə ilk zəngin sədalarını gözləyən birincilər və onların valideynlərini döşəmələri ara məsafələri göstərən işarələrlərlə döşənmiş məktəb həyətlərində qarşıladılar. Məktəbin foyelərində artıq 7 aya yaxın bizə tanış olan COVİD 19 pandemiyası zamanı zəruri olan davranış qaydalarını əks etdirən posterlər sanki “Hamınız məni oxuyun və mənə əməl edin” deyə boylanırdı.
Bütün bunlara baxmayaraq həm müəllim, həm də şagirdlərin gözlərindəki sevinc ifadələrini sezməmək mümkün deyildi. Sanki 7 aylıq həsrətdən sonra buz kimi soyuq divarlar da dilə gələrək şagird və müəllimlərə “Xoş gəldin” deyirdi. İbtidai siniflərdə əyani formada tədris olunan ilk dərslər “Gigiyena qaydalarına necə əməl edirəm”, distant şəkildə həyata keçirilən V-IX siniflərdə ilk dərslər “Müstəqil öyrənmə bacarıqlarına yiyələnmək zamanın tələbidir”, X –XI siniflərdə “Məsuliyyətli vətəndaş qüdrətli dövlət deməkdir” mövzularına həsr olunmuşdur. Müəllimlərin hazırladıqları təqdimatlar bu dərslərə xüsusi rəng qatmışdır.
Arzumuz budur ki, tezliklə bütün sinif otaqlarından şagirdlərin şən qəhqəhələri, tənəffüslərdə isə məktəb zənginin sədaları yüksəlsin.
