187 №-Lİ TAM ORTA MƏKTƏB

Məktəbdə 20 Yanvar faciəsinin 30-cu ildönümü ilə əlaqədar silsilə tədbirlər keçirildi. Tədbirlərdə ilk öncə faciə qurbanlarının xatirəsi bir dəqiqəlik sükutla yad edildi. Sonra məktəbin foyesində şagirdlərin hazırladıqları "Qanlı yanvar" adlı rəsim sərgisinə baxış keçirildi. Məktəbin direktoru Nailə Məmmədova 20 Yanvar hadisələri barədə şagirdlərə ətraflı məlumat verdi. Bildirdi ki, 1990-cı il yanvarın 19-dan 20-nə keçən gecə sovet ordusu tərəfindən Azərbaycan xalqına qarşı terror aktı törədilib. O, faciədən 30 il keçməsinə baxmayaraq, həmin gün yaşanan hadisələrin xatirələrimizdə yaşadığını, qan yaddaşımıza həkk olunduğunu vurğuladı. Tədbirlərdə qeyd edildi ki, 20 Yanvar hadisələri yalnız faciə deyil, həm şərəf, həm də ləyaqət səhifəsidir. Sonda "Ağla qərənfil ağla" adlı ədəbi-bədii kompozisiya təqdim olundu.

Azərbaycan Taekvondo Federasiyasının, Gənclər və İdman Nazirliyinin birgə təşkilatçılığı ilə Abşeron Olimpiya İdman Kompleksində keçirilən taekvondo üzrə respublika birinciliyi və çempionatına yekun vurulub. Qeyd edək ki, ölkəmizdə taekvondonun təbliği və inkişaf etdirilməsi, idmançıların yarış təcrübəsinin və ustalığının artırılması məqsədi daşıyan birincilik və çempionatda bütün bölgələrdən idmançılar mübarizə aparıblar. 24-28 dekabr 2019-cu il tarixlərində keçirilən taekvondo üzrə ölkə çempionatında Alpman Taekvondo Klubunun üzvü, məktəbimizin VIII sinif şagirdi Bağırov Vüqar yeniyetmələr arasında ölkə birinciliyinə layiq görülmüşdür. Biz də Vüqarı təbrik edir, ona dərslərində müvəffəqiyyətlər arzu edirik.

    Azərbaycan milli komandasının üzvləri İtaliyanın Venesiya şəhərində Gənclərin Karate1 Premyer Liqa turnirinin ilk günü 3 medal qazanıblar. 13-15 dekabr tarixlərində yarışın ilk günü mübarizəyə qatılan 16-17 yaşlı idmançılardan Polina Qurenko (-53 kq) və Ramil Baxşəliyev (-55 kq) turnirin gümüş mükafatını qazanıb. Öz çəki dərəcələrində favoritlərdən sayılan Hüseyn Məmmədli və Əminağa Quliyev (-61 kq) bürünc medal uğrunda həlledici görüşdə qarşılaşıblar. Hakimlərin qərarı ilə döyüşü daha fəal keçirən Ə.Quliyev qalib gəlib. Qeyd etmək istəyirik ki, Əminağa Quliyev məktəbimizin XI sinifində təhsil alır. Azərbaycan bayrağını beynəlxalq yarışlarda dəfələrlə yüksəklərə qaldırib, himnimizi qalib kimi dəfələrlə səsləndirib. Əminik ki, bundan sonra da Əminağa ölkəmizi ləyaqətlə təmsil edəcək və Vətənə böyük qələbə ilə qayıdacaq.

        27 dekabr 2019-cu il tarixdə “Mədəniyyətimiz-milli sərvətimizdir”  layihəsi çərçivəsində ibtidai sinif müəllimi Rəna Nəcəfovanın təşkilatçılığı ilə görkəmli Azərbaycan yazıçısı və şairi Mikayıl Müşfiqin yaradıcılığına həsr olunmuş tədbir keçirildi. Tədbiri giriş  sözü ilə aşan sinif müəllimi qeyd etdi ki, Mikayıl Müşfiq şəxsiyyəti milli şüur və vətənpərvərliyin timsalı, yaradıcılığı isə gənc nəslin milli mənlik şüurunun inkişaf etdirilməsi və gənclərimizdə vətənpərvərlik hisslərinin tərbiyəsində əvəzsiz xəzinədir. Tədbirdə məktəbin təlim-tərbiyə işləri üzrə direktor müavinləri Turan Cəbiyeva, Nigar Xəlilova və Gülnarə Məmmədova çıxış edərək, şairin həyat və yaradıcılığının müxtəlif istiqamətlərindən, sənətkarın dram, nəsr əsərlərindən, şeir və tərcümələrindən ətraflı danışdılar. Məktəbin rus bölməsinin IV sinif şagirdləri ədəbi bədii kompozisiyada nakam şairin yaradıcılığını əhatə edən şeirlər söylədilər, M.Müşfiqin şeirlərinə yazılmış mahnılar ifa etdilər. Sonda şairin həyat və yaradıcılığına həsr olunmuş filmdən bir parça nümayiş olundu.

26 dekabr 2019-cu il tarixində məktəbdə rus dili və ədəbiyyatı müəllimi Gülnarə Məmmədovanın təşkilatçılığı ilə istiqlal şairi Əhməd Cavadın 127 illik yubileyinə həsr olunmuş tədbir keçirildi. Tədbiri giriş sözü ilə açan Gülnarə Məmmədova, Əhməd Cavad yaradıcılığına nəzər salıb, onun kədərli taleyindən danışdı, Əhməd Cavadın bütün ömrünü Azərbaycan xalqının, bütövlükdə türk dünyasına həsr etdiyini bildirdi, şairin yaradıcılığında milli azadlıq və istiqlal uğrunda mübarizə motivlərinin zəngin olduğunu diqqətə çatdırdı. Tədbirdə həmçinin Əhməd Cavadın həyat və yaradıcılığını əks etdirən videoçarx nümayiş etdirildi və məktəbin VIII sinif şagirdlərinin ifasında görkəmli şairin şeirləri səsləndirildi.