150 №-li tam orta məktəb

Məktəbin psixoloqu S.Türfə 9-cu sinif şagirdləri ilə "İmtahan həyəcanını necə aradan qaldırmaq olar" adlı qrup məşğələləri keçirmişdir. İmtahan öncəsi həyəcan və təşviş halları yaşandıqda şagirdlərin nə etməli olacaqları və hansı texnikalardan istifadə edə biləcəkləri haqqında tövsiyələr vermişdir. Sonda onları maraqlandıran suallar ətrafında müzakirələr aparılmışdır.

3 mart 2024-cü ildə keçirilmiş XI sinif üzrə buraxılış imtahanlarının nəticələrinə əsasən məktəbimizin 11-ci sinif şagirdləri 200-dən artıq bal toplamışlar:

1. MƏMMƏDZADƏ RƏNA MAHİR – 274 bal

2. İBRAHİMLİ MUSA EMİL – 256 bal

3. İSKƏNDƏRLİ ELNARƏ KAMAL – 255 bal

4. İMANZADƏ MƏRYƏM ƏHMƏD – 249 bal

Yüksək nəticə göstərən bütün abituriyentləri təbrik edir, şagirdlərə uğurlar diləyir, blok imtahanında daha yüksək nəticələr əldə etmələrini arzulayırıq.

    Azərbaycan Respublikası Prezidentinin 2021-ci il 17 iyun tarixli 1367 nömrəli Fərmanı ilə yaradılmış “Təhsil Tələbə Krediti Fondu”-nun əsas məqsədlərinə - əhalinin aztəminatlı təbəqələrindən olan şəxslərin təhsilə əlçatanlığını təmin etmək, təhsil almaqda bərabər imkanlar yaratmaq və təhsilin əhatə dairəsini genişləndirmək – nail olmaq üçün Fond tərəfindən təbliğat və təşviqat işləri davam etdirilir. Ötən həftə Naxçıvan Muxtar Respublikasında start götürmüş bu tədbirlərin davamı olaraq, 1 aprel tarixində Faiq Rzayev adına 150 №-li tam orta məktəbdə görüş keçirildi. Hər rayon üzrə 5 ümumtəhsil müəssisəsində baş tutan görüşlərdə 9, 10 və 11-ci sinif şagirdləri iştirak edib.
    Fondun əməkdaşları tərəfindən görüş iştirakçılarına TTKF-nin fəaliyyəti, məqsədləri və qarşıya qoyulan hədəflər, həmçinin təhsil tələbə kreditinə müraciət qaydaları, kreditinin növləri, tətbiq olunan güzəştlər, ödəniş şərtləri və s. haqqında detallı məlumat verilib. Bildirilib ki, ali təhsil pilləsinin bakalavriat və magistratura (rezidentura) səviyyələrində, orta ixtisas təhsili pilləsində və peşə təhsili pilləsinin yüksək texniki və texniki peşə təhsili səviyyələrində əyani təhsil alan şəxslər təhsil tələbə kreditindən yararlana bilərlər. Qeyd olunub ki, bu günə kimi Fonda 40 mindən çox müraciət daxil olmuş və bunlardan 32 mindən çox şəxsə təhsil krediti ayrılmışdır.
    Görüş iştirakçılarının diqqətinə çatdırılıb ki, təhsil krediti birbaşa tələbələrin təhsil aldığı müəssisələrin hesabına köçürülür, təhsil haqqı kimi vacib bir məsələsi həll olunmuş tələbə bu qayğıdan azad olmaqla, şəxsi inkişafı və biliklərinin artırılmasına fokuslanmaq imkanı qazanır.
Sonda iştirakçıları maraqlandıran suallar cavablandırılıb və təkliflər dinlənilib.

29 mart tarixində Məktəbin İllik Fəaliyyət Planına və "7-dən 17-yə Vətənpərvər" layihəsinin icrasına uyğun olaraq məktəbin tarix müəllimi Q.Dilarə tərəfindən 31 Mart Azərbaycanlıların Soyqırımı Günü ilə əlaqədar seminar keçirildi.Tədbirdə şagirdlərə "31 Mart Azərbaycanlıların Soyqırımı Günü" haqqında geniş məlumatlar verildi, 31 Mart hadisələrindən bəhs olunan Videoslayd izlənildi, sonra şagirdlərlə geniş müzakirələr aparıldı.

Martın 28-də Yasamal rayon Heydər Əliyev Mərkəzində Bakı Şəhər Mədəniyyət Baş İdarəsinin təşkilatçılığı ilə xalq artisti Lütfəli Abdullayevin anadan olmasının 110-cu ildönümü ilə əlaqədar “Ulduz” filmi nümayiş olundu.
Filmin nümayişində Yasamal rayon 150 saylı tam orta məktəbin müəllim və şagirdləri iştirak etdilər.
Mərkəzin böyük elmi işçisi Arifə Mustafayeva tanınmış aktyor Lütfəli Abdullayevin həyat və fəaliyyəti, Azərbaycan kinosunda yaratdığı unudulmaz obrazlar haqqında qonaqlara məlumat verdi.
Sonra məktəblilər Azərbaycan kinosunun incilərindən olan, görkəmli aktyorun “Məhəmməd” obrazını yaratdığı “Ulduz” filmini izlədilər.