HAQQIMIZDA

            Binəqədi rayonu Namiq Babayev adına 144 nömrəli tam orta məktəb 1978-ci ilin avqustun 30-dan fəaliyyətə başlayıb. Məktəb Qarabağ döyüşlərində qəhrəmancasına şəhid olmuş məzun Namiq Babayevin adını daşıyır. Məktəb ibtidai (I-IV siniflər), ümumi orta (V-IX siniflər) və tam orta (X-XI siniflər) təhsil səviyyələrini əhatə edir.İbtidai təhsil səviyyəsi üzrə siniflərin sayı – 12, ümumi orta təhsil səviyyəsi üzrə siniflərin sayı – 15, tam orta təhsil səviyyəsi üzrə siniflərin sayı – 3 olmaqla, məktəb üzrə ümumilikdə 30 sinifdə 832 şagird təhsil alır. Təhsil müəssisəsində 68 pedaqoji işçi çalışır ki, onlar da şagirdlərin maraq və potensial imkanlarını, fərdi xüsusiyyətlərini nəzərə almaqla, onların zəruri biliklərə və həyati bacarıqlara yiyələnməsini, yaradıcı, milli-mənəvi və ümumbəşəri dəyərlərə malik sağlam əqidəli, vətənpərvər, müasir dünyagörüşlü şəxsiyyət kimi formalaşmasını, müstəqil həyatda səmərəli təhsil və əmək fəaliyyətinə hazırlanmasını təmin etmək üçün bilik və bacarıqlarını əsirgəmirlər.  Peşəkar müəllimlərin səyi nəticəsində təlim-tərbiyə prosesi dövlət standartlarına uyğun hazırlanmış müvafiq təhsil proqramları (kurikulumları) əsasında həyata keçirilir. Şagirdlərin yazılı və şifahi nitq inkişafının, idrak fəaliyyətinin gücləndirilməsi məqsədilə məktəbdə bilik yarışları, müxtəlif mövzularda müsabiqələr təşkil edilir, yüksək nəticə əldə etmiş şagirdlər dəyərləndirilirlər. Həmçinin ölkənin tarixi, ədəbiyyatı, incəsənəti, mədəniyyəti barədə təsəvvürlərin genişləndirilməsi, milli-mənəvi dəyərlərə sadiqlik və digər bu kimi keyfiyyətlərin formalaşdırılması məqsədilə  məktəb kitabxanasında tədbirlər keçirilir, eyni zamanda  Firudunbəy Köçərli adına Mərkəzi Uşaq Kitabxanası, şəhərin diyarşünaslıq və tarix muzeyləri ilə müntəzəm əməkdaşlıq edilir. Məktəbin maddi-tədris bazasının, təlim-tərbiyə işinin möhkəmləndirilməsi məqsədilə məktəbdə müxtəlif fənn kabinetləri: fizika kabineti, kimya laboratoriyası yaradılmış, "Kiçik akademiya"  təşkil edilmişdir. Məktəbin geniş bufeti və idman zalı şagirdlərin xidmətindədir. Şagirdlər burada müxtəlif idman yarışları və oyunlarında iştirak edirlər.

             Şagirdlərin asudə vaxtlarında mütaliə ilə  məşğul olmaları üçün müxtəlif ensiklopediyalar, jurnallar və kitablarla zəngin olan məktəb kitabxanası fəaliyyət göstərir. Eyni zamanda məktəbdə geniş akt zalı mövcuddur və  burada tədbirlərin təşkili üçün lazımi şərait yaradılmışdır. 

              Məktəb məzunlarından 6 qızıl və 19 gümüş olmaqla 25 nəfəri medala layiq görülmüşdür. Fəxrlə qeyd etmək lazımdır ki, məktəbin məzunlarından 115 nəfəri ölkədə keçirilən qəbul imtahanlarında 500 -dən yüksək bal toplamışdır. Onlardan 8 nəfəri 650 baldan yuxarı, 23 nəfəri 600-650 arası, 50 nəfəri 550-600 arası, 54 nəfəri isə 500-550 bal toplayaraq müxtəlif ali məktəblərə qəbul olmuşlar. Qeyd etmək lazımdır ki, 2018-2019-cu tədris ilində məktəbi bitirən 21 nəfərdən 20-si müxtəlif ali məktəblərə qəbul olmuşdur.Onlardan 2 nəfəri 609 və 611 bal toplamış, 2 nəfəri  500-dən çox, 5 nəfəri 400-dən çox və s., 2 nəfəri isə yüksək balla tədris dili ingilis dilində keçirilən xarici universitetlərə qəbul olmuşlar. Sevindirici haldır ki, bu məzunların sorağı nəinki vətənimizin, eləcə də vətənimizin hüdudlarından çox-çox uzaqlardan gəlir.

               Məktəb 2017-ci ildə Azərbaycan Respublikası Təhsil Nazirliyinin "Təhsildə inkişaf və innovasiyalar üzrə I Qrant müsabiqəsi"ndə iştirak edərək  ümumtəhsil məktəbləri nominasiyası üzrə "Tədrisin keyfiyyətinin yüksəldilməsində məktəblərarası əməkdaşlığın əhəmiyyəti" layihəsi və müəllim nominasiyası üzrə isə "Uşaq Forum-teatrının şagirdlərin şəxsiyyətyönlü inkişafında rolu: “İctimai nəqliyyatda davranış” mövzusunda forum-teatr" layihəsi (müəllim-Ceyhunə Novruzova)  ilə qalib olmuş  və bu layihələri uğurla həyata keçirmişdir.

  • h.a
  • i.a
  • fond
  • bakuedu
  • virtual_qarabaq
  • virtual_qarabaq
  • kurrikulum
  • MƏNİM MƏKTƏBİM