144 №-li tam orta məktəb

             IX sinif şagirdləri ilə psixoloji söhbət aparıldı.Təlim  buraxılış siniflərində şagirdlərdə  imtahan öncəsi yaşanan stress və həyəcanın aradan qaldırılması mövzusuna həsr olunmuşdu. Psixoloq  imtahanqabağı stressin, depressiya və yorğunluğun   şagirdlərin üzləşdiyi əsas problemlərdən olduğunu qeyd etdi. Statistikaya görə, şagird və abituriyentlərin 96 faizinin imtahan zamanı stress altında olmasını və bu stressin hətta yetərincə biliyi olanların belə yaxşı nəticə göstərmələrinə əngəl olduğundan və bu kimi əngəllərin  qarşısının alınması üsullarından, imtahan öncəsi şagirdlərin “görəsən sualları yaza biləcəm?”, “valideynlərimə nə deyəcəyəm ?”, “qohumlar haqqımda nə fikirləşəcək ?” kimi suallar ətrafında düşüncələrindən danışdı və bu səpkidə olan problemlərin həlli yollarından söhbət açdı. O,  imtahandan öncəki 1-2 günün ancaq istirahətə və bu zamanadək alınan  biliklərin sistemləşdirilməsinə sərf olunmasını, qida rejiminə xüsusilə düzgün əməl edilməsini  vurğuladı, öz məsləhət və tövsiyələrini verdi.

               Psixoloq həmçinin müəllim-şagird münasibətləri və bu münasibətlərdən doğan psixoloji məsələlərə, ünsiyyət bacarıqlarının inkişaf etdirilməsinə,daxili nəzarət və davranış qaydalarına əməl olunmasına və s. kimi mövzulara da toxundu.

           Binəqədi rayon Gənclər və İdman İdarəsinin təşkilatçılığı ilə keçirilən, gənclərin vətənpərvərlik tərbiyəsində müstəsna əhəmiyyəti olan “Şahin” hərbi-idman oyunlarında

( Əsasnaməyə müvafiq olaraq) bizim məktəbin şagirdlərindən ibarət komanda iştirak etdi. Komandalar VIII və X siniflər üzrə, hər sinifdən 5 oğlan və 2 qız olmaqla təşkil olunmuşdu.Şagirdlərimiz yarışda fəal iştirak edərək, rayon üzrə təmsil olunan 32 məktəb arasında  ilk onluq sıralarına  daxil ola bildilər və növbəti -  II mərhələyə vəsiqə qazandılar.

 Tədbirdə çağırışaqədərki hazırlıq müəllimi Z.Qarayev və fiziki tərbiyə müəllimi E.Babayev  iştirak edirdilər.

          “Şahin” hərbi-idman oyunlarının keçirilməsində məqsəd gənclərdə vətənpərvərlik tərbiyəsinin formalaşmasına təsir etmək, eyni zamanda məktəblilərin ordu sıralarında hərbi xidmətə hazırlanmasına köməklik göstərməkdən ibarətdir.

 Məktəbin akt zalında X sinif şagirdlərinin iştirakı ilə Azərbaycan yazıçısı, maarifçisi, şairi, materialist filosofu və ictimai xadimi,Azərbaycan dramaturgiyası və Azərbaycan ədəbiyyatında ədəbi tənqidin banisi M.F.Axundovun yaradıcılığına həsr olunan “M.F.Axundov və Azərbaycan dramaturgiyası” mövzusunda müzakirə keçirildi. Mirzə Fətəli Axundzadənın realist sənətkar, dramaturgiyamızın banisi, şair və nasir kimi ədəbiyyatımızın inkişafında müstəsna xifmətlərindən bəhs olundu,yaradıcılığı geniş şəkildə təhlil edildi.Azərbaycan dili və ədəbiyyat müəllimi V.Aslanovanın rəhbərliyi ilə keçirilən müzakirə şagirdlərin fəallığı ilə müşayiət olundu.Məqsəd şagirdlərə cəmiyyətdəki nöqsanların aradan qaldırılmasında bədii əsərlərin rolunun böyük əhəmiyyətə malik olmasını aşılamaq idi.Sonda dramaturqun Hekayəti-Müsyö Jordan və Dərviş Məstəli şah” komediyasının motivləri əsasında çəkilmiş “Dərviş Parisi partladır" filmi də nümayiş olundu.

 Məktəbin VII sinif şagirdi Əliyev Fərid Azərbaycan Respublikası İdman Mərkəzinin 2 saylı Respublika İxtisaslaşdırılmış Olimpiya Ehtiyatları Uşaq-Gənclər İdman məktəbinin 2004-2006-cı il təvəllüdlü oğlanlar arasında keçirilən 2№li RİOEMGİM-nin açıq birinciliyində 35 kq çəki dərəcəsində təşkil olunan yarışda II yer tutduğuna görə diplomla təltif olunub.

Bu münasibətlə Fəridi təbrik edir,nailiyyətlərinin davamlı olmasını arzu edirik!

 Psixoloq G.Hacıyev şagirdlərlə psixoloji söhbət apardı.”Davranış qaydaları” mövzusuna həsr edilən seminarda şagirdlərin ictimai həyatda,eləcə də, məktəb həyatında düzgün davranış və daxili intizam qaydalarına riayət olunması,müasir texnologiyanın insan psixologiyasına göstərdiyi müsbət və mənfi cəhətlərin təsiri,dərsə düzgün yanaşma tərzi,şəxsiyyətə və onun hüquqlarına hörmətin tərbiyə edilməsi, davranış mədəniyyətinin və ünsiyyət bacarıqlarının inkişafı və s. mövzulara toxunuldu.

 Məktəbdə davranış qaydaları ən sadə cəmiyyət qanunlarıdır və onlara əməl etməklə hər bir şəxs özünün yetkin şəxsiyyət kimi formalaşmasına zəmin yaradır.