Məmməd Cəfər Cəfərov-110
Ömrünün 60 ilə yaxın bir dövrünü ölkədə ədəbi-nəzəri fikrin inkişafına həsr etmiş, ədəbiyyatın tarixi və nəzəriyyəsi, ədəbi əlaqələr və eləcə də estetikanın aktual məsələlərinə dair fundamental araşdırmaları ilə Azərbaycan ədəbiyyatşünaslığını əhəmiyyətli dərəcədə zənginləşdirmiş, görkəmli ədəbiyyatşünas və tənqidçi, Azərbaycan Elmlər Akademiyasının həqiqi üzvü, Azərbaycanın Dövlət mükafatı laureatı, Əməkdar elm xadimi, filologiya elmləri doktoru, professor Məmməd Cəfər Zeynalabdin oğlu Cəfərovun anadan olmasının 110-cu illiyinin qeyd edilməsi haqqında Azərbaycan Respublikasının Prezidentinin 15 aprel 2019-cu il tarixli Sərəncamına əsasən məktəbin Fəaliyyət Planına uyğun 10a sinfində açıq dərs keçirildi. Akademikin həyat və fəaliyyəti haqqında videoçarx nümayiş olundu. Şagirdlər Məmməd Cəfər Cəfərovun geniş əhatəli elmi irsində Nizami Gəncəvi, Məhəmməd Füzuli, Mirzə Fətəli Axundzadə, Cəlil Məmmədquluzadə, Mirzə Ələkbər Sabir, Hüseyn Cavid və Səməd Vurğun kimi qüdrətli söz ustalarının yaradıcılıqlarının fəlsəfi-estetik mahiyyətini dünya ədəbi təcrübəsi ilə vəhdətdə dolğun şərh edən, yüksək elmi-nəzəri ümumiləşdirmə gücünə malik əsərləri haqqında əlavə məlumat verdilər. Məktəbin direktoru Nizaməddin Ağcayev alimin pedaqoji sahədəki, müəllifi olan qiymətli dərsliklər, həmçinin elmi kadrların hazırlanması istiqamətində təqdirəlayiq fəaliyyətini xüsusi vurğuladı.
