Moskvadakı uğurumuz
Son illərdə Azərbaycan dünyanın idman mərkəzlərindən birinə çevrilmiş və Bakıda bir sıra mötəbər idman yarışları yüksək və mütəşəkkil səviyyədə keçirilmişdir. Respublikamızda idman sahəsində əldə olunmuş nailiyyətlər, idmançılarımızın ən mötəbər beynəlxalq idman yarışlarında qazandığı uğurlar, Gənclər, İdman və Turizm Nazirlyi, Milli Olimpiya Komitəsi və ölkəmizdə idman növləri üzrə fəaliyyət göstərən federasiya, idman klubları və idman cəmiyyətlərinin sıx əməkdaşlığı sayəsində mümkün olmuşdur. Azərbaycanın ictimai həyatında mühüm amillərdən biri olan bədən tərbiyəsi və idmanın gündən-günə tərəqqisi naminə bu sahədə görülən işlər böyük bir fəaliyyət proqramının tərkib hissəsi kimi bundan sonra da uğurla həyata keçiriləcəkdir.
Azərbaycan "General" İdman Klubunda idmanın Taekvon-Do (İTF) növü ilə məşğul olan, məktəbin 6a sinif şagirdi Davud Məmmədzadə 09.12.2018-ci il tarixində Rusiyanın paytaxtı Moskva şəhərində Yüngül Atletika və Futbol kompleksində keçirilən əfsanəvi XVII "Moskva Çağırışı" adlı yarışlarda ölkəmizi təmsil edərək müvafiq kateqiriyada I yerə layiq görülmüş, Diplom və medalla təltif olunmuşdur. Balaca çempionu sinif yoldaşları və müəllimləri təntənə ilə qarşılamış və təbrik etmişlər. Məktəbin direktoru Nizaməddin Ağcayev bu yüksək nailiyyətinə çox sevindiyini, onunla qürur duyduğunu ifadə etmiş və Davuda gələcəkdə daha böyük uğurlara imza atacağına əmin olduğunu bildirmişdir.
