Vətən ona oğul dedi
Qarabağ uğrunda gedən döyüşlərdə fədakarcasına şəhid olmuş Hövsan sakini Etibar Firuz oğlu Cəfərovun xatirəsinə həsr olunmuş "Şəhidlər ölməz, Vətən bölünməz" adlı anım tədbiri keçirildi. Tədbirdə Suraxanı rayonu İcra Hakimiyyətinin Humanitar şöbəsinin müdiri Bərxudar Bərxudarov, Səfərbərlik Hərbi Xidmətə Çağırış üzrə Dövlət Xidmətinin Suraxanı İdarəsinin əməkdaşı, baş leytenant Mətləb Əhmədov, Azərbaycan Vətən Müharibəsi Veteranları Cəmiyyətinin Suraxanı şöbəsinin sədri Eldar Rüstəmov, Hövsan Gənclər Birliyinin sədri Anar Əsədullayev, şəhidin cəbhə yoldaşları, sinif yoldaşları, ailə üzvləri, ilk müəllimi Əliyeva Seyran, məktəbin müəllim və şagird heyəti, 270, 280 və 281 nömrəli tam orta məktəblərin direktorları, müharibə veteranları və əlilləri, digər qonaqlar iştirak edirdi. Tədbirdən əvvəl qonaqlar şəhid Etibar Cəfərovun həyat yoluna həsr olunmuş xüsusi guşə ilə tanış oldular.
Şagirdlərin ifasında vətənpərvərlik ruhlu şeirlər və mahnılar səsləndirildi, Qarabağ döyüşlərindən videoçarxlar nümayiş etdirildi. Tədbirdə iştirak edən qonaqlar öz çıxışlarında şəhidin ünvanına səmimi sözlər söylədilər, qüdrətli Azərbaycan Ordusunun Ali Baş Komandan, möhtərəm Prezidentimiz İlham Əliyevin rəhbərliyi altında dünya dövlətlərinin orduları sırasında yüksək mövqedə dayandığından bəhs etdilər. Azərbaycan Vətən Müharibəsi Veteranları Cəmiyyətinin Suraxanı şöbəsinin sədri Eldar Rüstəmov şagirdlərdə vətənpərvərlik hissərinin formalaşdırılması istiqamətindəki fəaliyyətinə görə məktəbin direktoru Nizaməddin Ağcayevi "Milli Ordu-100" medalı ilə təltif etdi. Tədbirin sonunda Suraxanı rayon İcra Hakimiyyətinin Humanitar şöbəsinin müdiri Bərxudar Bərxudarov çıxış edərək məktəbin direktoru Nizaməddin müəllim başda olmaqla məktəb kollektivinə təşəkkür etdi. Nizaməddin müəllim tədbirin təşkilatçıları Rəhilə Hacıyevaya, Mehparə Salmanovaya, Elmira Qədirovaya xüsusi fəallıq göstərdiklərinə görə öz minnətdarlığını bildirdi. Belə tədbirlərin keçirilməsinin bütün şagirdlərdə vətənpərvərlik hissini aşılanması üçün sitimul yaratdığını qeyd etdi.
