31 dekabr - Dünya Azərbaycanlılarının Həmrəylik Günü və Yeni il
30.12.2016-cı il tarixində 118 nömrəli tam orta məktəbdə 10a sinfinin təşkil etdiyi “31 dekabr-Dünya Azərbaycanlılarının Həmrəylik Günü” və “Yeni il” münasibətilə bayram tədbiri keçirilmişdir.Tədbir Azərbaycanın dövlət himninin səsləndirilməsi ilə başlandı.Daha sonra tədbirin aparıcıları Dünya Azərbaycanlılarının Həmrəyliyi Günü barədə geniş məlumat verdilər və qeyd etdilər ki, 31 dekabr Azərbaycan millətinin ümumdünya birlik günüdür.Bu bayram ayrı-ayrı ölkələrdə yaşayan azərbaycanlılarla əlaqələr qurmaq, onlar arasında birlik və həmrəylik yaratmaq işində mühüm rol oynayır.Dünya Azərbaycanlılarının Həmrəylik Gününün qeyd edilməsi bütün dünya azərbaycanlıları tərəfindən artıq bir zərurətə və mənəvi ehtiyaca çevrilmişdir.Dünya Azərbaycanlılarının Həmrəylik Gününün əsası 1989-cu il dekabrın axırlarında Naxçıvanda sərhədlərin (SSRİ-İran sərhədləri) dağılması zamanı qoyuldu.Şimali və Cənubi Azərbaycan arasındakı sərhəd dirəkləri dağıdıldı.Bu vaxt İstanbulda türk dilli xalqların Konfransı keçirilirdi.Konfransda dünya azərbaycanlılarının həmrəyliyinin qeyd olunmasına qərar verdi.1991-ci ilin 16 dekabrında Naxçıvan Muxtar Respublikası Ali Məclisinin sədri Heydər Əliyev dünya azərbaycanlılarının birliyini yaratmağın əhəmiyyətini nəzərə alaraq dekabrın 31-ni Dünya Azərbaycanlılarının Həmrəylik Günü elan etdi. Naxçıvan MR Ali Məclisinin bu qərarını əsas tutaraq Azərbaycan Respublikası Ali Sovetinin Milli Şurası 1991-ci il dekabrın 25-də qərara gəldi ki, hər il dekabrın 31-i dünyada yaşayan azərbaycanlıların həmrəylik günü kimi qeyd edilsin.Beləliklə, bütün azərbaycanlılar üçün əziz olan 31 dekabr Dünya Azərbaycanlılarının Həmrəylik Günü bayram edilir.Azərbaycanlılar bu gün ilə fəxr edir və onu qürurla qeyd edirlər.Tədbirdə şagirdlərin ifasında şeirlər və musiqilər səsləndirildi,Azərbaycan kino incilərindən səhnəciklər nümayiş olundu.Sonda çıxış edən məktəbin direktoru Nizaməddin Ağcayev tədbir iştirakçılarını təbrik etdi və tədbirin təşkilatçılarına öz təşəkkürünü bildirdi.
