«Məktəbimizin şən hekayəsi» təşəkkürnamə aldı
İyun ayının 24 –də Azərbaycan Respublikası Təhsil Nazirliyi, Bakı Şəhəri üzrə Təhsil İdarəsi və Community.az portalı tərəfindən elan edilmiş «Məktəbini tanıt» videoçarx müsabiqəsinin mükafatlandırılma mərasimi keçirildi. Mükafatlandırma mərasimində Bakı Şəhəri üzrə Təhsil İdarəsinin sektor müdirləri Lamiyə Şərəfxanova, Afiq Əzizov, «Allianz Consult» şirkətinin proqram koordinatoru Mədinə Sadiqova, layihənin sponsorları Sağlam Ailə Tibb Mərkəzi və “Şərq-Qərb” Nəşriyyat evinin nümayəndələri çıxış edərək öz təəssüratlarını bölüşdülər. 5 nominasiya - «Bizim məktəbimiz nə ilə fərqlənir», «Məktəbimizin məzunları», «Məktəbin şən hekayəsi», «Gələcəyin məktəbi» və «Bizim sinif icmasının uğurları» nominasiyaları üzrə təşkil edilmiş məktəblərarası “Məktəbini tanıt” videoçarx müsabiqəsində iştirak edən 91 ümumtəhsil məktəbin Community.az saytında yerləşdirdiyi vidoçarxlar arasından seçilən qalib məktəblərin videoları nümayiş olundu və xüsusi diplomlarla təltif olundular. Bəzi məktəblər isə fərqli təqdimata görə təşəkkürnamə ilə dəyərləndirildilər. Məktəbimizin 9c sinif icmasının «Məktəbin şən hekayəsi» nominasiyası üzrə hazırladığı videotəqdimat da təşəkkürnaməyə layiq görüldü. 2 dəqiqəlik videoçarxda şagirdlərimizin və tarix müəllimi Şəfiqə Həsənovanın məktəb haqqında hazırladıqları qısa hekayə maraqlı alındı. Məktəbin direktoru N. Ağcayev də layihə iştirakçılarını təbrik etdi. Gələcək videomüsabiqələrdə daha yüksək nailiyyətlər əldə etmək üçün daha ciddi səylə çalışacağımızı qarşımıza məqsəd qoymuşuq.
