10 nömrəli tam orta ümumtəhsil məktəbi

İlk zəng çalınıb!

     15 Sentyabr 2025-ci il tarixində 10 nömrəli tam orta məktəbdə Bilik Gününə həsr olunmuş tədbir keçirilib. Tədbirdə Nizami Rayon İcra Hakimiyyətinin nümayəndəsi Könül İsmayılova, pedaqoji kollektiv, valideynlər və şagirdlər iştirak ediblər. 
     Yığıncaq Dövlət Himninin səsləndirilməsi ilə başlayıb. Şəhidlərimizin əziz xatirəsi bir dəqiqəlik sükutla yad edilib. Sonra direktor Şəfayət Orucova çıxış edərək, şagirdləri, müəllimləri və valideynləri yeni tədris ili münasibətilə təbrik edib, onlara uğurlar arzulayıb. 
     Daha sonra qonaqlar öz çıxışlarında təbriklər səsləndiriblər. Tədbir balacaların ifasında rəqs və şeirlərlə davam etdirilib. 
     Sonda çalınan zəngin sədaları altında şagirdlər siniflərə daxil olublar.

Bakı Şəhəri üzrə Təhsil İdarəsinin (BŞTİ) tabeliyindəki ümumi təhsil müəssisələrində Bilik Günü ilə bağlı tədbirlər keçirilib.

Tədbirlərdə elm və təhsil nazirinin müavini Həsən Həsənli, Elm və Təhsil Nazirliyinin Aparat rəhbərinin müavini Fərzəli Qədirov, Elm və Təhsil Nazirliyinin Uşaq və gənclərin inkişafı siyasəti şöbəsinin müdiri Elnur Əliyev, Məktəbəqədər və Ümumi Təhsil üzrə Dövlət Agentliyinin (MÜTDA) direktoru Eşqi Bağırov, MÜTDA-nın direktor müavini, Bakı Şəhəri üzrə Təhsil İdarəsinin (BŞTİ) müdiri vəzifəsini müvəqqəti icra edən Nərminə Hüseynova, Elm və Təhsil Nazirliyinin, MÜTDA-nın və BŞTİ-nin struktur bölmə rəhbərləri, yerli icra hakimiyyəti orqanının nümayəndələri, şəhid ailələrinin üzvləri və qazilər, ziyalılar, müəllim və valideynlər iştirak ediblər.

Azərbaycan Respublikasının Dövlət Himninin səsləndirilməsi ilə başlayan tədbirlərdə Vətən uğrunda canlarını qurban vermiş şəhidlərin əziz xatirəsi bir dəqiqəlik sükutla yad edilib.

Tədbirlərdə çıxış edən müəssisə rəhbərləri yeni tədris ilində qarşıya qoyulan hədəflərdən və təhsil sahəsində aparılan islahatlardan söz açıblar.

Elm və Təhsil Nazirliyinin, MÜTDA-nın, BŞTİ-nin nümayəndələri və qonaqlar yeni dərs ilində müəllim və şagirdlərə uğurlar arzulayıblar. Bildirilib ki, ümumi təhsil müəssisələrində ilk dərslər “Konstitusiya və Suverenlik İli”nə həsr olunub. Tədbirdə iştirak edən qonaqlar, həmçinin ilk dərs prosesini də izləyiblər.

Qeyd edək ki, yeni tədris ilində BŞTİ-nin tabeliyində fəaliyyət göstərən ümumi təhsil müəssisələrində ümumilikdə, 505 766 şagird təhsil alacaq.

Valideyn iclasları keçirilib. 

     Yeni tədris ilinin başlanması ilə əlaqədar sinif rəhbərləri tərəfindən valideynlərlə maarifləndirici görüşlər, sinif iclasları keçirilib.

Pedaqoji Şuranın iclası keçirilib. 

     12 sentyabr 2025-ci il tarixində 2025-2026-cı tədris ilinin başlanması ilə əlaqədar 10 nömrəli tam orta məktəbdə Pedaqoji Şuranın iclası keçirilib.
     İclası giriş sözü ilə açan direktor Şəfayət Orucova yeni tədris ili münasibətilə pedaqoji kollektivin üzvlərini təbrik edib, uğurlar arzulayıb.
     Sonra 2024-2025-ci tədris ilinin yekunları, IX və XI siniflərin buraxılış və qəbul imtahanlarının nəticələri müzakirə olunub, qazanılmış nailiyyətlər və buraxılmış nöqsanlar barədə ətraflı fikir mübadiləsi aparılıb. Direktor yeni tədris ilində qarşıda duran vəzifələr, hədəflər haqqında geniş məlumat verib.
     İclas direktor müavinlərinin çıxışı ilə davam etdirilib. Sonda yekun qərarlar qəbul olunub.

Nizami rayonu 10 nömrəli tam orta məktəbin coğrafiya, fizika, kimya, biologiya fənn müəllimləri ARTİ-nin təşkil etdiyi 2025-2026-cı tədris ilində ümumtəhsil müəssisələrinin 7-ci siniflərində tətbiq olunacaq yeni nəsil "Coğrafiya", 8-ci siniflərində tətbiq olunacaq yeni nəsil "Fizika", "Kimya", "Biologiya" dərslik komplektinin məzmunu və tədrisi texnologiyasının xüsusiyyətləri vebinarlarında iştirak etmişlər.