10 №-li tam orta məktəb

Məhəmməd Füzulinin anadan olmasının 530 illiyi ilə əlaqədar dəyirmi masa keçirilib. 

     "Dahi Azərbaycan şairi Məhəmməd Füzulinin anadan olmasının 530 illiyinin qeyd edilməsi haqqında" Azərbaycan Respublikası Prezidentinin Sərəncamının icrası ilə əlaqədar olaraq aprel ayı ərzində “Məktəblərdə Məhəmməd Füzuli ayı” layihəsinə start verilmişdir. Layihənin məqsədi məktəblilər arasında milli-mənəvi dəyərləri təbliğ etmək, dahi şairin zəngin ədəbi-bədii irsi ilə bağlı gənc nəsli maarifləndirmək, onların yaradıcılıq, intellektual qabiliyyətlərinin inkişafı üçün şərait yaratmaqdır.
  24 aprel 2024-cü il tarixdə məktəbin Azərbaycan dili və ədəbiyyatı müəllimi Allahverdiyeva Gülnarə 10 "a" sinfində "Füzuli dünyası" adlı dəyirmi masa keçirib. Tədbirdə tərbiyə işləri üzrə direktor müavini Səbirə Həsənova da iştirak edib. 
     Gülnarə müəllim M.Füzulinin həyat və yaradıcılığı haqqında ətraflı məlumat verib. Dahi klassik Məhəmməd Füzuli dünyasına səyahət şagirdlərin xüsusi marağına səbəb olub.

2024-cü il aprelin 22-də Moskvada Azərbaycan Respublikasının Prezidenti İlham Əliyevin və Rusiya Prezidenti Vladimir Putinin “Baykal-Amur” magistralının 50 illik yubileyi münasibətilə dəmir yolu sahəsinin veteranları və işçiləri ilə birgə görüşü keçirilib.
   Görüşdə müasir Rusiya – Azərbaycan münasibətləri, dostluq, qarşılıqlı anlaşma məsələləri, qarşılıqlı dəstək, regional təhlükəsizlik məsələləri, perspektiv əməkdaşlıq istiqamətləri də öz əksini tapmışdır. Vaxtilə Azərbaycan və Rusiyanın vahid ittifaqda yer alması ölkələr arasında münasibətlərin özünəməxsus xarakterini formalaşdırıb. Müstəqillik illərində də əlaqələr daha da inkişaf edib. Ümummilli lider Heydər Əliyevin Azərbaycanda siyasi hakimiyyətə qayıdışından sonra ölkələrimiz arasında münasibətlərin ən yüksək səviyyədə inkişaf etdirilməsinə başlanılıb.
   Görüşdə çıxış edən Rusiya Prezidenti Vladimir Putin demişdir:
“Yarım əsr əvvəl – elə bu günlərdə “Baykal-Amur” magistral xəttinin tikintisinə başlanıldı. BAM, həmçinin Sovet İttifaqının hər yerindən olan iki milyon gəncin nəhəng əməyinin və cəsarət təbəssümüdür. BAM-ın tikintisinə başlanılmasının yarıməsrlik yubileyi münasibətilə Azərbaycan Prezidenti İlham Heydər oğu Əliyevi şəxsən təbrik etməkdən çox məmnunam. Onun atası Heydər Əlirza oğlu Əliyev BAM-ın tarixində müstəsna, böyük rol oynayıb. Heydər Əliyev SSRİ Nazirlər Soveti sədrinin birinci müavini vəzifəsində BAM-ın tikintisinə rəhbərlik edir və bu çətin layihənin həyata keçirilməsi üçün əlindən gələni əsirgəmirdi. Rusiya – Azərbaycan əməkdaşlığının digər sahəsi bu gün BAM-ın miqyasına və tarixi əhəmiyyətinə uyğundur. Söhbət “Şimal – Cənub” nəqliyyat dəhlizinin inkişafından gedir. 
   Görüşdə Azərbaycan Respublikasının Prezidenti İlham Əliyev çıxış edərək bildirmişdir: “Bu gün biz müttəfiqlik, qarşılıqlı fəaliyyət çərçivəsində həyata keçirilən əməkdaşlığımızın bir çox planlarının icra edilməsi məsələlərini müzakirə etdik. Əlbəttə, Heydər Əliyev amili dövlətlərarası münasibətlərimizdə həmişə mühüm rol oynayıb və oynayacaqdır. Çünki o, Moskvada – bu binada, Kremldə işlədiyi illərdə Sovet dövlətinin və ona tapşırılan sahənin inkişafına rəvac etmək üçün böyük səylər göstərib. Onlardan biri də nəqliyyat sahəsi idi. 
   Bu gün biz təkcə nəqliyyat layihəsi həyata keçirmirik, həm də “Şimal – Cənub” beynəlxalq nəqliyyat dəhlizinin yaradılmasında fəal iştirak edirik, həm iqtisadi, həm siyasi, enerji, humanitar və bir çox digər sahələrdə fəal əməkdaşlıq aparırıq”.
   Humanitar əlaqələr də Azərbaycan – Rusiya əməkdaşlığında mühüm yer tutur.
   Rusiya rəhbərliyinin, həmçinin ictimaiyyətinin Heydər Əliyevin xatirəsinə göstərdikləri ehtiramı Azərbaycan xalqı yüksək qiymətləndirir!

Bakı Şəhəri üzrə Təhsil İdarəsinin tabeliyindəki ümumi təhsil müəssisələri üzrə I sinfə qəbul prosesində prioritet tətbiq olunacaq məktəblərin siyahısı açıqlanıb.

Belə ki, məktəblərə şagird qəbulu sərbəst formada və prioritetə (üstünlük hüququ) əsasən aparılacaq. Sərbəst formada şagird qəbulu aparılan məktəblərə valideynlər şəxsi kabinet vasitəsilə məktəb və müəllim seçimini birbaşa edəcəklər. Prioritet (valideyn və ya uşağın məktəbin müəyyənləşdirilmiş ərazisinə (dislokasiya) qeydiyyatı olmalı, bacı-qardaşı həmin məktəbdə hazırda təhsil almalı, valideynlərindən biri həmin məktəbdə çalışmalı) üzrə valideynlər isə ilk növbədə müəyyən edilmiş müddətdə (Azərbaycan bölməsi üzrə 3 may-3 iyun 2024-cü il, tədrisi digər dillərdə aparılan bölmələr üzrə isə 12 iyun-12 iyul 2024-cü il tarixlərində) üstünlük hüquqlarından biri əsasında  sorğu yerləşdirə bilərlər. Prioritetlərin tətbiqi yaşayış sıx olan ərazilərdə valideynlərin məktəb seçimini asanlaşdırmaq məqsədlərinə xidmət edir.

Qeyd edək ki, müvafiq müddət başa çatdıqdan sonra üstünlük hüququ tətbiq olunan məktəblərdə boş qalan şagird yerlərinə sərbəst qəbul (tədrisi digər dillərdə olan və müsabiqə yolu ilə qəbul aparılan liseylər istisna olmaqla) aparılacaq.

Məlum olduğu kimi, mayın 1-də 2024-2025-ci tədris ili üzrə ümumi təhsil müəssisələrinin birinci siniflərinə şagird qəbulu üzrə uşaqların qeydiyyatına www.mektebeqebul.edu.az elektron portalı vasitəsilə start veriləcək.

Prioritet tətbiq olunan məktəblərin siyahısı:

Azərbaycan bölməsi üzrə üstünlük hüququ tətbiq olunan məktəblər

Tədrisi digər dillərdə aparılan bölmələr üzrə üstünlük hüququ tətbiq olunan məktəblər

Şagirdlərimiz təltif olunublar.

     19 aprel 2024-cü il tarixdə Xətai Sənət Mərkəzində “Yaşıl dünya naminə həmrəylik ili” ilə  əlaqədar Mərkəzdə həyata keçirilən “Bir ağac - bir dünya”, "Hər damcı bir həyatdır” layihələri çərçivəsində əl işləri  və rəsmlərdən ibarət  yekun rəsm sərgisi təşkil olunub.  
     Sərgidə 5 nömrəli Uşaq-Gənclər İnkişaf Mərkəzinin "Aplikasiya və dekorativ rəsm” dərnəyinin üzvləri olan şagirdlərimizin də rəsm və əl işləri nümayiş olunub. Sonda onlar sertifikatla təltif olunublar.

Şagirdimiz təltif olunub. 

     Yeni Azərbaycan Partiyası Nizami rayon təşkilatı tərəfindən keçirilən Ulu Öndər Heydər Əliyevin 101-ci ildönümünə və 2024-cü il "Yaşıl Dünya naminə həmrəylik ili"nə həsr olunmuş "Yaşıl dünya naminə həmrəylik" mövzusunda rəsm sərgisində III yerin qalibi olduğuna görə məktəbin X "c" sinif şagirdi Süleymanova Leyla sertifikatla təltif olunub. 
     Bu münasibətlə şagirdimizi məktəbin direktoru Şəfayət Orucova təbrik edib, ona bundan sonra da uğurlar arzulayıb.