“Şagirdlərə yol hərəkəti qaydalarının öyrədilməsi” mövzusunda söhbətlər aparılmışdır
Dekabrın 19-da 94 nömrəli tam orta məktəbdə “Şagirdlərə yol-hərəkəti qaydalarının öyrədilməsi” mövzusunda tədbir keçirilmişdir. Tədbirdə Bakı şəhər Baş Polis İdarəsinin Dövlət Yol Polisi Xidmətinin şöbə rəisi, polis polkovniki Vaqif Əsədov, Sabunçu rayon Polis İdarəsinin Yol Polisi Xidmətinin rəis müavini, polis kapitanı Elmar Əbilov, Bakı şəhər 1 saylı Uşaq - Gənclər İnkişaf Mərkəzinin şöbə müdiri, Azərbaycan Respublikasının Əməkdar Müəllimi Fəridə Süleymanova və mərkəzin metodisti Tahirə Həsənova iştirak etmişlər. Tədbiri giriş sözü ilə məktəbin direktoru Şəmsəddin Vəliyev açmışdır. O, qonaqları salamlamış və tədbirin əhəmiyyətindən danışmışdır. Yol hərəkəti zamanı təhlükəsiz davranış qaydaları haqqında qısametrajlı filmlər nümayiş etdirildikdən sonra qonaqlar çıxış etmişlər. Vaqif Əsədov çıxışını diskussiya formasında qurmuşdur ki, bu da şagirdlərin və müəllimlərin böyük marağına səbəb olmuşdur. Sonda Vaqif Əsədov şagirdləri maraqlandıran suallara cavab vermişdir.
