Qarabağ çağırır bizi
Noyabrın 30-da 94 nömrəli tam orta məktəbdə “Qarabağ çağırır bizi!” adlı tədbir keçirilmişdir. Tədbirdə məktəb rəhbərliyi, müəllim və şagird kollektivi, Sabunçu Rayon İcra Hakimiyyəti başçısının müavini Rəna Fərəcova, Azərbaycan Qarabağ Müharibəsi Əlilləri, Veteranları və Şəhid Ailələri ictimai birliyinin sədri Mehdi Mehdiyev, Qarabağ müharibəsi iştirakçıları və qonaqlar iştirak etmişlər. Tədbiri giriş sözü ilə tərbiyə işləri üzrə direktor müavini Hicran İsmayılova açaraq gələn qonaqları salamlamış və onları tədbir iştirakçılarına təqdim etmişdir. Sonra söz məktəbim direktoru Şəmsəddin Vəliyevə verilmişdir. Şəmsəddin Vəliyev şagirdlərin vətənpərvərlik ruhunda tərbiyəsi mövzusuna toxunaraq qeyd etmişdir ki, bugünkü gündə onlardan səylə oxumaq, çalışmaq, nizam-intizamlı olmaq, bilik və bacarıqlarını artırmaq tələb olunur ki, gələcəkdə vətənə, xalqa layiqincə xidmət edə bilsinlər. Çıxışdan sonra məktəbin şagirdləri “Qarabağ çağırır bizi!” mövzusunda hazırladıqları ədəbi-bədii kompozisiyanı təqdim etmişlər. 3-cü sinif şagirdi Nəzrin Ramazanlının oxuduğu “İgid əsgər, möhkəm dayan!”, 4-cü sinif şagirdlərininin ifasındakı “Mən əsgər gedirəm, ana!” səhnəsi, 5-ci sinif şagirdi Nəsimi Sadıqlının söylədiyi “Sən qalib gələcəksən!” şeiri, 9-cu sinif şagirdi Nəzrin Ramazanlının ifa etdiyi “Torpağın səsi!” mahnısı, 11-ci sinif şagirdlərinin səsləndirdikləri “Cənab leytenant!” mahnısı tədbir iştirakçılarının alqışlarına səbəb oldu. Tədbir Azərbaycan Bayrağının dalğaları altında tədbir iştirakçılarının ifasında “Azərbaycan” mahnısının səslənməsi ilə yekunlaşdı.
Tədbir çərçivəsində bir qrup Qarabağ müharibəsi iştirakçısına “Vətən naminə” medalı və diplom təqdim olundu. Eyni zamanda, tədbirdə fəal iştirak etdiklərinə görə məktəb rəhbərliyi, bir qrup müəllim və şagird heyəti Azərbaycan Qarabağ Müharibəsi Əlilləri, Veteranları və Şəhid Ailələri ictimai birliyi tərəfindən Fəxri Fərman, Diplom və Tərifnamə ilə tətif olundular.
Sabunçu rayonunda vətənpərvərlik mövzusunda maarifləndirici tədbir keçirildi http://sabunchu-ih.gov.az/news/554.html
