Peşə bayramınız mübarək, əziz müəllimlər!
Oktyabrın 5-də 94 nömrəli tam orta məktəbdə Beynəlxalq Müəllimlər Günü ilə əlaqədar tədbir keçirilmişdir. Tədbirdə məktəb rəhbərliyi, kollektiv üzvləri, şagirdlər, valideynlər iştirak etmişlər. Məktəbin direktoru Şəmsəddin Vəliyev çıxış edərək bayram münasibətilə tədbir iştirakçılarını təbrik etmişdir. O öz çıxışında müəllimin qiymətli əsərlərin təməl daşını qoyan memar olduğunu vurğulamış, görkəmli şəxsiyyətlərin müəllim adına dedikləri hikmətli sözləri xatırlatmışdır. Sonra şagirdlər hazırladıqları bayram proqramını təqdim etmişlər. 10b sinif şagirdi İsmayılzadə Sənanın, 8a sinif şagirdi Fərzəliyeva Leylanın söylədikləri şeirlər, 8b sinif şagirdi Ramazanlı Nəzrinin, 8-ci sinif şagirdləri Əliyeva Aqilə, Məmmədli Fidan və Şahverdili Arzunun, 5e və 6e sinif şagirdlərinin oxuduqları mahnılar, 9a və 7e sinif şagirdlərinin göstərdikləri səhnəciklər, 8-ci sinif şagirdləri Naibova Aynanın və Səmədzadə Aynanın, 7a sinif şagirdi Babayeva Zəhranın, 5a sinif şagirdi İsmayılova Fidanın ifalarındakı rəqslər, 8e sinif şagirdi Məmmədova Ceyran və 8b sinif şagirdi Süleymanova Aytənin skripkada səsləndirdikləri musiqi tədbir iştirakçıları tərəfindən alqışlarla qarşılanmışdır. Proqramın yekunu olaraq məktəbin direktoru Şəmsəddin Vəliyev səhnəyə 9a sinif şagirdi Əbilov Məhəmmədmehdini dəvət etmiş, onu Gürcüstanda cüdo üzrə keçirilən yarışlarda növbəti uğura imza atması münasibətilə təbrik etmiş və onun simasında gələcəyin Olimpiya çempionunu gördüyünü qeyd etmişdir. Daha sonra Şəmsəddin Vəliyev məktəbin təlim-tərbiyə işləri üzrə direktor müavini Rəhilə Tağıyevanı anadan olmasının 55 illiyi münasibətilə təbrik etmiş, pedaqoji fəaliyyətini dəyərləndirərək məktəb rəhbərliyi adından Fəxri Fərman vermişdir. Sonda məktəbin təməli qoyulan gündən məktəb kitabxanasında əvvəlcə kitabxanaçı, 1979-cu ildən bu günə kimi isə kitabxana müdiri işləmiş Esmeralda Mehdiyeva səhnəyə dəvət edilmiş və məktəbin direktoru Şəmsəddin Vəliyev ona uzun illər nümunəvi fəaliyyətinə görə kollektiv adından təşəkkür edərək demişdir: “Hörmətli Esmeralda xanım!Bakı şəhəri 94 nömrəli tam orta məktəbin kollektivi adından Sizi salamlayırıq. Siz uzun illər məktəbin kitabxanasına rəhbərlik etmisiniz. Bu illər ərzində məktəbin qazandığı uğurlarda Sizin də payınız vardır. Böyük fəxrlə deyə bilərik ki, pedaqoji işçilərimizin yaradıcılığında və şagirdlərimizin mütaliə vərdişlərinin təkmilləşdirilməsində xidmətləriniz əvəzsiz olmuşdur. Kitabxana işinin fəaliyyətində və kitab fondunun qorunub saxlanmasındakı fəaliyyətiniz təqdirəlayiqdir. Kitabxananı həmişə öz eviniz bilmisiniz. Ona görə də kitabxanaya gələn hər bir şəxs – müəllim də, şagird də, valideyn də həmişə Sizin işinizdən razı qalmışlar. Hörmətli Esmeralda xanım!Sizə uzun ömür, cansağlığı arzulayırıq. Arzu edirik ki, həmişə indi olduğu kimi cavan qalasınız, daim üzü gülər olasınız. Bir daha Sizə 94 nömrəli tam orta məktəbdə nümunəvi fəaliyyətinizə görə minnətdarlığımızı bildiririk.”Bununla da Beynəlxalq Müəllimlər Gününə həsr olunmuş tədbir başa çatmışdır.
