Bu gün "Son zəng"dir
Iyunun 14-də 94 nömrəli tam orta məktəbdə “Son zəng” tədbiri keçirilmişdir. Tədbirdə məktəb rəhbərliyi, müəllimlər, valideynlər, Sabunçu rayon İcra Hakimiyyətinin nümayəndəsi iştirak etmişlər. Məktəbin direktoru Şəmsəddin Vəliyev çıxışında cari tədris ilində müxtəlif müsabiqələrdə, idman yarışlarında uğur qazanmış, ictimai işlərdə fəallıq göstərmiş şagirdlərimizin əldə etdiyi nailiyyətlərdən söz açmışdır. Daha sonra isə onbirinciləri təbrik edərək yeni həyat yollarında uğurlar diləmiş, təhsildə fərqlənən bir qrup məzuna məktəb rəhbərliyi adından diplomlar təqdim etmişdir. Bu təbriklərə məktəbin təlim-tərbiyə işləri üzrə direktor müavinləri Nailə Həsənova, Rəhilə Tağıyeva, Sabunçu rayon İcra Hakimiyyətinin nümayəndəsi Səbahət Hünbətova, onbirincilərin sinif rəhbərləri Elmira Əliyeva, Aygün Əhmədova, Elza Hüseynova, digər fənn müəllimləri və valideynlər də qoşularaq məzunlara xoş arzu və diləklərini çatdırmışlar. Sonda söz məzunlara verilmişdir. Məzunlar da öz növbələrində on bir təhsil aldıqları məktəbin rəhbərliyinə, müəllimlərə təlim-tərbiyə işlərində onlara sərf etdikləri zəhmətə, verdikləri təhsilə görə təşəkkürlərini bildirmişlər. “Son zəng” tədbiri məzunların hazırladıqları musiqili proqram ilə başa çatmışdır.
