Məktəbimiz Azərbaycan Respublikasının Milli Qəhrəmanı şəhid Tahir Əminağa oğlu Bağırovun adını daşıyır. Tahir Əminağa oğlu Bağırov 14 iyul 1957-ci ildə Türkmənistan Respublikasının Krasnovodsk (indiki Türkmənbaşı) şəhərində anadan olmuşdur. Milliyətcə azərbaycanlıdır. Şirvan şəhərində 1974-cü ildə 8-ci sinifi bitirmiş, həmin ildə sürücülük sənətinə yiyələnmişdi. 1977-ci ilin may ayıdan 1979-cu ilin sentyabr ayınadək keçmiş Sovet Ordusu sıralarında həqiqi hərbi xidmətdə olmuşdur. Hərbi xidməti başa vurduqdan sonra Xətai rayonunda yerləşən Bakı İstilik-Elektrik Mərkəzinin nəqliyyat sexində çalışmışdır.
Dağlıq Qarabağ müharibəsi başlananda T.Bağırov da Azərbaycanın qeyrətli oğulları kimi ön cəbhəyə yollanmışdır. 1992-ci ilin 1 mart tarixində 843-cu hərbi hissənin komandirinin əmri ilə Tahir təlim komandirinin müavini təyin olunmuş, sonra isə Azərbaycan Respublikası hərbi hava qüvvələrinin Mİ-24 helokopterində bort atıcısı vəzifəsinə keçirilmışdi. Qarabağda Ermənistan ekspedisiya korpusuna qarşı keçirilən hərbi əməliyyatlarda iştirak etmişdir.
1992-ci il 11 oktyabrda gedən döyüşlərdə baş çavuş T.Bağırov qəhrəmancasına həlak olmuşdur. Ailəli idi. İki oğlu yadigar qaldı.
Azərbaycan Respublikası Prezidentinin 9 fevral 1993-cü il tarixli fəmanı ilə Tahir Əminağa oğlu Bagırova Azərbaycanın Milli Qəhrəmanı adı verilmişdir. Bakı şəhərində, xalqımızın and yerinə çevrilmiş Şəhidlər xiyabanında dəfn edilmişdir.