Yurdumuza yaz gəlir
Tarixi çox qədim olan Novruz bayramı hər il xalqımız tərəfindən böyük təntənə ilə qeyd olunur. Mənəvi dəyərlərimizi, adət-ənənələrimizi özündə yaşadan Novruz bayramı insanlar arasında birliyin və mehribançılığın möhkəmləndirilməsi, onların bir-birinə mərhəmət və diqqət göstərməsi kimi sağlam bir təməl yaratmışdır. Məktəbdə təşkilatçı Səadət Alışova və ədəbiyyat fənn müəllimi Həbibə Məmmədovanın təşəbbüsü əsasında elimizə baharın gəlişini qarşılamaq məqsədi ilə "Yurdumuza yaz gəlir" adlı bayram tədbiri təşkil olundu. Tədbirdə Azərbaycan Respublikasının Ailə, Qadın və Uşaq Problemləri üzrə Dövlət Komitəsinin sədri Sədaqət Qəhrəmanova, Bərabər İnkişaf Naminə Koalisiyanın sədri Təranə Kərimova, Ailə,Qadın və Uşaq Problemləri üzrə Dövlət Komitəsinin sədr müavini və Bərabər İnkişaf Naminə Koalisiyanın Səbail rayon üzrə kordinatoru Sədaqət Həsənova, məktəbin direktoru Tərlan Bayramova, Səbail rayon şəhid ailələri çıxış etdilər. Tədbir Azərbaycan Dövlət Himinin səsləndirilməsi və Azərbaycanın müstəqilliyi və ərazi bütövlüyü uğrunda canından keçən qəhrəmanlarımızın əziz xatirəsinin anılması ilə başlandı. Daha sonra məktəbin istedadlı şagirdlərinin ifasında ədəbii-bədii kompozisiyası nümayiş olundu. Sonda məktəb kollektivi adından şəhid ailələrinə bayram sovqatları təqdim edildi.
