51 №-li tam orta məktəb

   Məktəbdə 2023-2024-cü tədris ilinin yekununa dair Pedaqoji Şura iclası keçirildi. Məktəbin direktoru Tərlan Bayramova iclası öz çıxışı ilə açıq elan etdi. 2023-2024-cü tədris ilində məktəbdə tədris və təlim-tərbiyə prosesinin müvafiq əmr və təlimatlara uyğun təşkil olunduğu və bu istiqamətdə görülən işlər barədə məlumat verdi. Həmçinin şagirdlərin nailiyyətləri, monitorinq nəticələri, IX və XI siniflərin buraxılış imtahan nəticələri, tədris ili ərzində məktəbin qazandığı uğurlar barədə pedoqoji kollektivi məlumatlandırdı və bu işdə əməyi olan hər bir müəllimə təşəkkürünü bildirdi.

Təlim-tərbiyə işləri üzrə direktor müavinlərinin tədris ilinin yekunlarına dair təlim nəticələri və digər görülmüş işlər barədə hesabatları dinlənildi. Sonda fəaliyyətində fərqlənən müəllimlər rəhbərlik tərəfindən dəyərləndirildi.

Bakı Şəhəri üzrə Təhsil İdarəsi (BŞTİ) tərəfindən paytaxtın təhsil müəssisələrinin iştirakı ilə “Məktəblinin yay mütaliəsi” adlı layihəsinə start verilir.

Layihənin əsas məqsədi şagirdlərin yay tətili günlərində asudə vaxtlarının səmərəli təşkili, mütaliəyə maraqlarının artırılması, kitab mübadiləsi mədəniyyətinin genişləndirilməsi, oxu bacarıqlarının inkişaf etdirilməsi və nitq vərdişlərinin təkmilləşdirilməsindən ibarətdir.

Layihə çərçivəsində paytaxtın təhsil müəssisələri şagirdlərin oxuduğu kitabları əks etdirən fotoşəkilləri, yaxud oxuduqları əsər və onun müəllifi ilə bağlı fikirlərinə dair videogörüntüləri məktəbin sosial şəbəkə hesablarında #məktəblininyaymütaliəsi haşteqi ilə paylaşması nəzərdə tutulur.

Qeyd edək ki, layihə sentyabr ayına qədər davam edəcək.

İyunun 21-də dövlət ümumi təhsil müəssisələrində çalışan təhsilverənlərin sertifikatlaşdırılması prosesinin test imtahanı mərhələsinə başlanılıb.

Qaydalara müvafiq olaraq, test imtahanı ilə bağlı məlumat 15 may tarixində iştirakçıların şəxsi kabinetlərinə göndərilib.

Bakı Şəhəri üzrə Təhsil İdarəsinin tabeliyindəki ümumi təhsil müəssisələrində çalışan 2 379 təhsilverən sertifikatlaşdırma prosesinin test imtahanı mərhələsinə  dəvət olunub.

Məktəbəqədər və Ümumi Təhsil üzrə Dövlət Agentliyinin direktor müavini, Agentliyin Bakı Şəhəri üzrə Təhsil İdarəsinin müdiri vəzifəsini müvəqqəti icra edən Nərminə Hüseynova və BŞTİ-nin müvafiq struktur bölmə rəhbərləri imtahan mərkəzinə gəlib və müəllimlərə öz tövsiyələrini verib, uğurlar arzulayıb.

Qeyd edək ki, test imtahanı mərhələsində 120 dəqiqə müddətində təhsilverənlərin tədris etdiyi fənn üzrə ümumi təhsil proqramlarına, tədris metodikasına və təlim strategiyalarına aid 60 sual təqdim edilir. Hər düzgün cavab 1 balla qiymətləndirilir. Bu mərhələnin nəticələri üzrə balların hesablanması avtomatlaşdırılmış rejimdə proqram təminatı vasitəsilə həyata keçirilir və imtahan başa çatdıqdan dərhal sonra namizədin kompüterinin ekranında görünür.

Nəzərinizə çatdırırıq ki, test imtahanında mümkün 60 baldan minimum 30 bal toplamış təhsilverənlər sertifikatlaşdırmanın müsahibə mərhələsinə iştirak hüququ qazanacaq.

Xatırladaq ki, Nazirlər Kabinetinin 18 avqust 2022-ci il tarixli qərarına əsasən, dövlət ümumi təhsil müəssisələrinin təhsilverənlərinə sertifikatlaşdırmanın nəticəsinə uyğun olaraq tədris edilən dərs saatına görə test imtahanı mərhələsində nəticə göstərənlərin vəzifə maaşlarına əlavələr ediləcək.

Sertifikatlaşdırmada iştirak edən bütün müəllimlərə uğurlar arzulayırıq!

    Məktəbdə 2023/2024-cü tədris ilinin “Son zəng” tədbiri keçirildi. Tədbirdə Səbail rayon İcra Hakimiyyətinin nümayəndəsi Seymur Həsənov , şəhid valideyinləri və məktəb kollektivi iştirak etdilər. Azərbaycan Dövlət Himninin səsləndirilməsi ilə başlanan tədbirdə Azərbaycanın müstəqilliyi və ərazi bütövlüyü uğrunda canlarını fəda etmiş şəhidlərin xatirəsi bir dəqiqəlik sükutla yad olundu. Daha sonra məktəbin direktoru Tərlan xanım Bayramova, Səbail rayon İcra Hakimiyyətinin nümayəndəsi Seymur Həsənov, şəhid Murad Qurbanovun anası Mehriban xanım Əmrahova, şəhid mayor İlkin Əhədzadənin anası Asəmən xanım Əhədovanın, direktor müavini Şəhla Hüseynova və müəllimlərin çıxışları dinlənildi. Tədbirdə məktəbin 2023-2024 cü il məzunlarının ifasında musiqili çıxışlar nümayiş olundu.

    "Son zəng" tədbirinin keçirilməsi barədə Azərbaycan Respublikası Elm və Təhsil Nazirliyi yanında Məktəbəqədər və Ümumi Təhsil üzrə Dövlət Agentliyinin 03.06.2024-cü il tarixli, 3-29-69/3-2-12F/2024 nömrəli əmrinin icrasının təmin etmək məqsədilə "Bakı Şəhəri üzrə Təhsil İdarəsi haqqında Əsasnamə"nin 15.6-cı bəndininə əsasən 11.06.2024-cü il tarixdə verilən əmrin icrası ilə bağlı məktəb rəhbərliyinin Xl sinif şagirdləri ilə görüşü keçirildi.

Görüşdə "Son zəng"lə bağlı təlimat şagirdlərin nəzərinə çatdırıldı.