321 №-li tam orta məktəb

Bakı Şəhəri üzrə Təhsil İdarəsinin (BŞTİ) təşkilatçılığı ilə 1 iyun - Uşaqların Beynəlxalq Müdafiəsi Gününə həsr olunmuş “Uşaqlar gələcəyimizdir”adlı onlayn tədbir keçirilib.

Məktəbli uşaqların iştirakı ilə keçirilən onlayn tədbirdə Təhsil naziri Ceyhun Bayramov və BŞTİ-nin müdiri Rəşad Tağıyev də iştirak ediblər.

Tədbirin keçirilməsində əsas məqsəd xüsusi istedada malik uşaqların (gənclərin) yaradıcılıq nümunələrini həmyaşıdlarına təqdim etmək, bacarıqlarını daha da inkişaf etdirmək, onları ictimaiyyətə tanıtmaq, uşaqlarda özünəinam, Vətənə məhəbbət, dostluq, sülhsevərlik, milli-mənəvi və ümumbəşəri dəyərlərə hörmət hisslərini tərbiyə etmək, ümumilikdə onlar arasında daha yüksək əhval-ruhiyyə yaratmaqdan ibarətdir.

Təhsil naziri Ceyhun Bayramov uşaqları bayram münasibətilə təbrik edərək bu günün bütün dünyada uşaqların müdafiəsi işinə diqqəti artırmaq məqsədilə qeyd olunduğunu nəzərə çatdırıb. Nazir ölkəmizdə uşaqlara göstərilən dövlət qayğısının gücləndirilməsi, onların həyat şəraitinin yaxşılaşdırılması istiqamətində görülən işlərdən danışıb. Bütün uşaqlar üçün bərabər təhsil imkanlarının təmin olunduğunu söyləyən C.Bayramov koronavirus (COVİD-19) pandemiyası dövründə uşaqların təhsildən kənarda qalmaması üçün Azərbaycanda yaradılmış şəraitdən bəhs edib.

BŞTİ-nin müdiri Rəşad Tağıyev ölkəmizdə uşaqlara dövlət səviyyəsində diqqət və qayğının əsasının ümummilli lider Heydər Əliyev tərəfindən qoyulduğunu, bu ənənənin Prezident İlham Əliyev və Birinci vitse-prezident Mehriban xanım Əliyeva tərəfindən uğurla davam etdirildiyini vurğulayıb. İdarə müdiri çıxışı zamanı Azərbaycanda həyata keçirilən strategiyanın əsas prioritetlərindən biri kimi uşaqların sağlam, firavan böyüməsi və gələcəklərinin tam təmin olunmasına xüsusi şərait yaradıldığını bildirib.

Onlayn tədbir paytaxt məktəblilərinin və Uşaq-Gənclər İnkişaf Mərkəzlərinin dərnək üzvlərinin ifasında musiqi nömrələri, ədəbi-bədii kompozisiyalar, səhnəcik və rəqslərlə davam edib. Çıxış edən məktəblilər uşaqlara olan diqqət və qayğının əhəmiyyətinə dair fikirlər söyləyiblər.

Ümumi təhsil məktəblərinin tədris digər dildə aparılan bölmələrində məktəbəhazırlıq qruplarına cəlb edilmiş uşaqların I sinfə qəbulu üzrə onlayn müsahibələr davam edir.

Belə ki, övladı tədris digər dildə aparılan bölmə üzrə məktəbəhazırlıq qruplarına cəlb edilmiş, lakin mövcud sanitar-epidemioloji vəziyyətlə bağlı şifahi nitq bacarıqlarının qiymətləndirilməsi üçün təşkil edilmiş müsahibəsi təxirə salınmış uşaqların valideynlərinə (qanuni nümayəndə) şəxsi kabinetə daxil olub, onlayn və ya ənənəvi (canlı) müsahibə formasını seçmək imkanı yaradılıb.

Onlayn müsahibə üçün müraciət edən vətəndaşların övladları mayın 20-dən etibarən şəxsi kabinetlərindəki bildirişdə qeyd olunmuş tarixə uyğun olaraq onlayn müsahibədə iştirak edirlər.

Onlayn müsahibənin nəticəsi məqbul hesab edilən uşaqlar üçün sistemdə həmin bölmə üzrə I sinfə avtomatik sorğu yerləşdiriləcək. Müsahibənin nəticəsi məqbul hesab edilməyən uşaqlar üçün Azərbaycan bölməsi üzrə müraciət etmək imkanı yaradılacaq.

Onlayn müsahibə prosesi zamanı obyektivlik və şəffaflığın tam təmin olunması üçün videoçəkiliş aparılır.

Ənənəvi (canlı) müsahibə üçün müraciət edən vətəndaşlara isə iyun ayı ərzində qeydiyyatdan keçdikləri mobil nömrəyə müsahibənin keçiriləcəyi tarix və yer haqqında bildiriş göndəriləcək, eyni zamanda bu məlumatlar valideynin şəxsi kabinetində bildiriş formasında əksini tapacaq.

Qeyd edək ki, Nazirlər Kabinetinin "Azərbaycan Respublikasının ərazisində iş və istirahət günlərinin yerinin dəyişdirilməsi və xüsusi karantin dövründə qeyri-iş günlərinin müəyyən edilməsi haqqında" Qərarına uyğun olaraq, tədris digər dildə aparılan bölmə üzrə I sinfə müraciət etmiş və məktəbəhazırlıq qruplarına cəlb edilməmiş uşaqların valideynləri iyunun 1-dən şəxsi kabinetlərində şifahi nitq bacarıqlarının qiymətləndirilməsi üzrə onlayn və ya ənənəvi (canlı) müsahibə formasını seçə bilərlər.

İyun ayı ərzində müsahibənin keçirilmə tarixi barədə valideynlərin qeydiyyatdan keçdikləri mobil nömrəyə SMS vasitəsilə bildiriş göndəriləcək, eyni zamanda bu məlumatlar valideynin şəxsi kabinetində bildiriş formasında əksini tapacaq.

Bakı Şəhəri üzrə Təhsil İdarəsi (BŞTİ) tərəfindən onlayn videotəqdimat müsabiqəsinə start verilib.

28 may - Respublika Gününə həsr edilmiş müsabiqə BŞTİ-nin tabeliyindəki ümumi təhsil məktəblərinin VII-XI sinif şagirdləri arasında keçirilir.

Müsabiqənin keçirilməsində əsas məqsəd şagirdlərdə vətənpərvərlik ruhunu yüksəltmək, gənc nəslin tariximiz haqqında biliklərini  möhkəmləndirmək, şagirdləri baş verən ictimai-siyasi prosesləri daha dərindən öyrənməyə həvəsləndirmək, onların ədəbi-bədii təfəkkürünün düzgün istiqamətdə formalaşmasına və özünüifadə qabiliyyətlərinin inkişaf etdirilməsinə təkan vermək, habelə xüsusi istedada malik uşaqları üzə çıxarmaqdan ibarətdir.

Müsabiqə iştirakçıları “Müstəqillik tariximizin şanlı səhifəsi” başlığı altında təqdimatla çıxış edəcək. Çıxışlar 25 may 2020-ci il tarixinədək video formatında BŞTİ-nin mk@baku.edu.gov.az elektron poçt ünvanına göndərilməlidir. Video göndərilərkən iştirakçının adı, soyadı və atasının adı, əlaqə nömrəsi, rayon və oxuduğu təhsil müəssisəsi və уa məşğul olduğu məktəbdənkənar təhsil müəssisəsinin adının qeyd olunması mütləqdir.

Hər iştirakçı müsabiqəyə yalnız 1 videotəqdimatla qatıla bilər.

Videotəqdimat 5 dəqiqədən artıq olmamalıdır.

Videotəqdimatlar Münsiflər heyəti tərəfindən qiymətləndiriləcək. Qiymətləndirilmə zamanı sərbəstlik, söz ehtiyatının zənginliyi, dolğun və əhatəli məzmun, irəli sürülən fikirlərin faktlarla əsaslandırılması əsas meyarlar kimi götürüləcək.

Müsabiqənin yekununda ümumilikdə 6 iştirakçı (1 nəfər – I yer, 2 nəfər- II yer, 3 nəfər - III  yer) qalib seçiləcək.

Qaliblərə BŞTİ tərəfindən diplom və hədiyyələr təqdim olunacaq. 5 nəfər isə fəal iştirakına görə Tərifnamə ilə təltif olunacaq.

Bakı Şəhəri üzrə Təhsil İdarəsi (BŞTİ) tərəfindən ümummilli lider Heydər Əliyevin anadan olmasının 97-ci ildönümü münasibətilə təşkil olunmuş Bakı şəhər məktəblilərinin əl işlərindən ibarət virtual sərgi başa çatır.

4-10 may tarixlərini əhatə edən sərginin təşkil olunmasının əsas məqsədi yaradıcılığın müxtəlif sahələrində xüsusi istedada malik uşaqları üzə çıxarmaq, məktəblilərə Vətənə, dövlətçilik tariximizə və müstəqil Azərbaycan dövlətinin qurucusu Heydər Əliyev irsinə məhəbbət, milli-mənəvi və ümumbəşəri dəyərlərə hörmət hisslərini aşılamaq, onların bədii-estetik zövqünü və yaradıcı düşüncəsini inkişaf etdirməkdən ibarətdir.

Qeyd edək ki, hər il ulu öndərin anadan olmasının ildönümü ərəfəsində BŞTİ tərəfindən təşkil olunan ənənəvi sərginin bu il mövcud tibbi-profilaktik vəziyyət nəzərə alınaraq, virtual keçirilməsi qərara alınıb.

Sərgidə iştirak etmək istəyən BŞTİ-nin tabeliyindəki ümumi təhsil məktəbləri şagirdlərinin və məktəbdənkənar təhsil müəssisələrindəki dərnək üzvlərinin əl işləri tədris müəssisələrinin rəhbərləri tərəfindən mk@baku.edu.gov.az elektron poçt ünvanına göndərilib.

BŞTİ-nin rəsmi internet saytında, sosial şəbəkə səhifələrində və kütləvi informasiya vasitələrində yayımlanan virtual sərgidə istedadlı şagirdlərin təsviri incəsənət, dekorativ tətbiqi sənət, floristika, fauna, elmi-texniki və dizayn sahələrindən ibarət əl işləri nümayiş olunub.

Mayın 4-də ümummilli lider Heydər Əliyevin anadan olmasının 97-ci ildönümünə həsr olunmuş Bakı şəhər məktəblilərinin əl işlərindən ibarət virtual sərgiyə start verilib.

Bakı Şəhəri üzrə Təhsil İdarəsinin (BŞTİ) təşkilatçılığı ilə keçirilən sərginin əsas məqsədi yaradıcılığın müxtəlif sahələrində xüsusi istedada malik uşaqları üzə çıxarmaq, məktəblilərə Vətənə, dövlətçilik tariximizə və müstəqil Azərbaycan dövlətinin qurucusu Heydər Əliyev irsinə məhəbbət, milli-mənəvi və ümumbəşəri dəyərlərə hörmət hisslərini aşılamaq, onların bədii-estetik zövqünü və yaradıcı düşüncəsini inkişaf etdirməkdən ibarətdir.

Qeyd edək ki, hər il ulu öndərin anadan olmasının ildönümü ərəfəsində BŞTİ tərəfindən təşkil olunan ənənəvi sərginin bu il mövcud tibbi-profilaktik vəziyyət nəzərə alınaraq, virtual keçirilməsi qərara alınıb.

Sərgidə BŞTİ-nin tabeliyində olan ümumi təhsil məktəblərinin şagirdləri və məktəbdənkənar təhsil müəssisələrinin dərnək üzvlərinin əl işləri idarənin rəsmi internet saytı və sosial şəbəkə səhifələri vasitəsilə sərgilənəcək. Sərgidə istedadlı şagirdlərin təsviri incəsənət, dekorativ tətbiqi sənət, floristika, fauna, elmi texniki və dizayn sahələrindən ibarət əl işləri nümayiş olunacaq.

Virtual sərginin mayın 10-a kimi davam etdirilməsi nəzərdə tutulur.