31 №-li tam orta məktəb

Ümumi təhsil müəssisələrinin IX-XI sinif şagirdlərinin iştirakı ilə keçirilən “Zəkaların mübarizəsi” olimpiadasının bilik yarışı kateqoriyasında Bakı şəhəri üzrə regional mərhələsi keçirilib.

Paytaxtdakı 133 nömrəli tam orta məktəbdə təşkil olunan tədbirdə Elm və Təhsil Nazirliyi yanında Məktəbəqədər və Ümumi Təhsil üzrə Dövlət Agentliyinin (MÜTDA) direktor müavini, Bakı Şəhəri üzrə Təhsil İdarəsinin müdiri vəzifəsini müvəqqəti icra edən Nərminə Hüseynova, Yasamal Rayon İcra Hakimiyyətinin (RİH) başçısının müavini Təravət Muradova, Təhsil İnstitutunun direktor müavini Fuad Qarayev, BŞTİ-nin struktur bölmə rəhbərləri, məktəb direktorları və “Zəkaların mübarizəsi” olimpiadasının regional mərhələsinə vəsiqə qazanan komandalar iştirak ediblər.

Tədbir Dövlət Himninin səsləndirilməsi, Vətən şəhidlərinin əziz xatirəsinin bir dəqiqəlik sükutla yad edilməsi ilə başlayıb.

Tədbirdə Nərminə Hüseynova Heydər Əliyev Fondu və Elm və Təhsil Nazirliyinin birgə əməkdaşlığı ilə reallaşdırılan olimpiadanın əsas məqsədinin fənlərin dərindən öyrənilməsinə marağın artırılması, onların dünyagörüşünün genişləndirilməsi, sağlam rəqabət mühitinin  yaradılması, şagirdlər arasında dostluq əlaqələrinin qurulması və ümumilikdə şagirdlərin öyrənməyə təşviq edilməsindən ibarət olduğunu xatırladıb.

 Regional mərhələdə iştirak edən komandalara uğurlar arzulayan N.Hüseynova bu cür olimpiadaların şagirdlərin  bilik və bacarıqlarını artırmaqla bərabər, həm də  onlarda təlim motivasiyasını yüksəldəcəyinə, özünəinam hissinin artırılmasına müsbət təsir göstərəcəyinə əminliyini ifadə edib.

Təhsil İnstitutunun direktor müavini Fuad Qarayev, Yasamal RİH başçısının müavini Təravət Muradova olimpiada və müsabiqələrdə istedadlı şagirdlərin üzə çıxarılmasının ölkəmizin gələcək yüksək savada malik kadr potensialının formalaşması baxımından önəmli rolunu vurğulayıb, bu cür bilik yarışlarının şagirdlərə yalnız elm deyil, həm də dünyagörüşü qazandırdığını bildiriblər.

Tədbir ədəbi-bədii kompozisiyalarla davam edib.

Daha sonra regional mərhələyə vəsiqə qazanmış 12 komanda riyaziyyat-məntiq, rəqəmsal texnologiyalar, təbiət elmləri, humanitar elmlər, mədəniyyət və incəsənət olmaqla 5 müxtəlif istiqamət üzrə 25 sualı cavablandırıblar.

 İlk 5 yeri tutan komandalar - Xəzər, Nəsimi, Yasamal, Xətai və Nərimanov komandaları olimpiadanın respublika mərhələsində iştirak hüququ qazanıb.

Qalib komandalara diplomlar təqdim olunub.

Bakı Ali Neft Məktəbində  "Sabahın alimləri"  XIV  respublika müsabiqəsinin final turu baş tutub.Final turunda məktəbimizin  komandası da iştirak edib.Onlara uğurlar arzulayırıq.

Bakı Şəhəri üzrə Təhsil İdarəsinin tabeliyindəki ümumi təhsil müəssisələrinin şagirdləri Qazaxıstan universitetlərinin təhsil sərgisinə baxış keçiriblər.

Məktəblilərin sərgi ilə yaxından tanış olması onların dünyagörüşünün inkişafı, elmi-tədqiqatlara və təhsilə marağının artırılması, yeni təhsil imkanları ilə tanış olmaları baxımından mühüm əhəmiyyət kəsb edir.

Bakı İdman Sarayında keçirilən sərgidə məktəblilər Qazaxıstanda müxtəlif təhsil səviyyələri və ixtisas istiqamətləri üzrə ali məktəblərin təhsil imkanları barədə məlumat əldə etmək şansı qazanıblar.

Qeyd edək ki, sərginin əsas məqsədi Qazaxıstan universitetlərini Azərbaycan ictimaiyyətinə tanıtmaq və iki ölkə arasında təhsil sahəsində əməkdaşlığı gücləndirməkdən ibarətdir. Təhsil sərgisində Qazaxıstan Respublikasının 20-dən çox ali təhsil müəssisəsi iştirak edir.

2025-2026-cı tədris ili üzrə paytaxt məktəblərində birinci sinfə elektron qeydiyyat prosesinə hazırlıq çərçivəsində mikroərazilər üzrə ünvanların dəqiqləşdirilməsi ilə bağlı 76 vətəndaş müraciəti cavablandırılıb və müvafiq qaydalara uyğun şəkildə icra olunub.

12-18 fevral tarixlərində valideynlər müvafiq məsələlərlə bağlı Bakı Şəhəri üzrə Təhsil İdarəsinin (BŞTİ) Çağrı Mərkəzinə (146-1 nömrəli), [email protected] elektron poçtuna, 5, 6 və 7 saylı “ASAN xidmət” mərkəzlərinin təhsil xidmətləri bölməsinə müraciət ediblər.

Qeyd edək ki, I sinfə elektron qeydiyyat prosesi ilə bağlı məktəblərin mikroərazi üzrə ünvanları vətəndaşlara açıqlanıb. I sinfə elektron qeydiyyatla bağlı mikroərazilər müvafiq icra hakimiyyət orqanlarının təqdim etdikləri dislokasiyaya uyğun olaraq müəyyənləşdirilib.

Vətəndaşlar müvafiq linkə daxil olaraq daimi qeydiyyat ünvanının (yeni inşa olunmuş binalarda “Azərişıq” ASC-nin abonent kodu öz adına olan evlərin ünvanının) dislokasiyada olmasını dəqiqləşdirməlidirlər. Daimi qeydiyyat ünvanı (yeni inşa olunmuş binalarda “Azərişıq” ASC-nin abonent kodu öz adına olan evlərin ünvanı) dislokasiyada olmayan valideynlər müvafiq formanı doldurub, martın 3-nə kimi 5, 6 və 7 saylı “ASAN xidmət” mərkəzlərinin təhsil xidmətləri bölməsinə yaxınlaşaraq və ya [email protected] elektron poçtuna göndərərək təklif və rəylərini verə bilərlər.

Əlavə sualı olan vətəndaşlara Bakı Şəhəri üzrə Təhsil İdarəsinin Çağrı Mərkəzinə (146-1) zəng etmək tövsiyə olunur.

"Sabahın alimləri" Respublika Layihə Müsabiqəsinin nəticələri elan olunub.Şagirdlərimiz tərəfindən müsabiqəyə dörd tədqiqat işi təqdim olunub.Nəticə olaraq 10-cu sinif şagirdləri Kərimli Nuray və  Abdullayev  Məhəmmədəlinin hazırladığı tədqiqat işi finala keçərək sərgidə nümayiş olunacaqdır.Layihə rəhbəri Ülviyyə Həsənovadır.Məktəbimizin komandasına uğurlar arzulayırıq.