15 aprel akademik Zərifə Əliyevanın anım günüdür
Aprelin 15-də məktəbdə görkəmli oftalmoloq alim, akademik Zərifə xanım Əliyevanın anım günü ilə bağlı olaraq məktəb rəhbərliyinin və müəllimlərin iştirakı ilə “Dəyirmi masa” keçirildi. Zərifə Əliyevanın həyatı, tibbi fəaliyyəti, kitabları barədə ətraflı çıxışlar edildi. Bildirildi ki, Zərifə Əliyevanın Azərbaycanda oftalmologiya elminin inkişafında müstəsna xidmətləri var. O, vaxtilə Azərbaycanda geniş yayılmış traxomanın, dünya təcrübəsində birincilər sırasında peşə, xüsusilə kimya və elektron sənayelərində peşə fəaliyyəti ilə bağlı göz xəstəliklərinin öyrənilməsi, profilaktikası və müalicəsinə, habelə oftalmologiyanın müasir problemlərinə dair bir çox yüksək tədqiqatların, o cümlədən “Terapevtik oftalmologiya”, “İridodiaqnostikanın əsasları” kimi nadir elmi əsərlərin müəlliflərindən biri, 12 monoqrafiya, dərslik və dərs vəsaitinin, 150-yə yaxın elmi işin, 1 ixtira və 12 səmərələşdirici təklifin müəllifidir. Zərifə Əliyeva yüksək ixtisaslı səhiyyə kadrları hazırlanmasına böyük əmək sərf edib.
