284 №-li tam orta məktəb

Məktəbimizdə şagirdlərimizin vətənpərvərlik tərbiyəsinə xüsusi fikir verilir. Belə ki, fəaliyyət planına əsasən yanvar və fevral aylarında şagirdlərin  Şəhidlər Xiyabanı və Hərb tarixi muzeyinə ekskursiyaları nəzərdə tutulmuşdur. Artıq bir qrup şagirdlər Şəhidlər Xiyabanını ziyarət etmişlər.7-ci sinif şagidləri Hərb tarixi müzeyində olmuşlar.Muzeyin eksponatları ilə tanış olan şagirdlər , dövlətimizin hərb tarixinə dair maraqlı faktlar öyrənmişlər.

Məktəbin fəaliyyət planına əsasən psixoloq İlahə Rüstəmovanın iştirakı ilə  VII sinif şagirdlərl arasında  "Narkotik maddələr və onların insan həyatına təsiri" mövzusunda söhbət aparıldı. Söhbət zamanı narkotik maddələrin insan həyatına mənfi təsirləri haqqında şagirdlərə geniş məlumat verildi.Onları maraqlandıran məqamlara toxunuldu. Söhbət zamanı "Narkotik maddələr və onların insan həyatına təsiri"  mövzusuna həsr edilmiş videoçarx nümayiş etdirildi.

Hər il olduğu kimi fevralın ikinci həftəsi məktəbdə olan tədbirlər şəhid  Qamət Abbasovun əziz xatirəsinə həsr olunur.Məktəbin ibtidi siniflərində Qamət Abbasov haqqında şagirdlərə məlumatlar verilir, bədii özfəaliyyət dərnəyinin üzvləri tərəfindən  şəhidə həsr edilmiş bədii kompozisiya hazırlanır. Fevral ayının 12-də şəhidin anası Yavər xanım məktəbə dəvət olunub. O, şagirdlərlə oğlu haqqında  öz xatirələrini bölüşüb, vətənpərvərlik haqqında məlumat verib. Tədbir iştirakçıları tərəfindən şəhid Qamət Abbasovun büstünə gül dəstələri qoyulub, onun xatirəsi bir dəqiqiəlik sükutla yad edilib.

Hər il olduğu kimi bu tədris ilində də "İnsan alveri və onun qurbanları" haqqında məktəbin 9 cu siniflərində təhsil alan şagirdlərlə söhbət aparıldı. Məktəbin psixoloqu İlahə Rüstəmli  insan alveri və onun potensial qurbanları haqqında şagirdlərə məlumat verdi. Sonra bu mövzu ilə bağlı videorolik şagirdlərə nümayiş etdirildi.Söhbətin sonunda məktəbin psixoloqu şagirdləri maraqlandıran sualları cavablandırdı. 

Bakı Şəhəri üzrə Təhsil İdarəsinin (BŞTİ) təşkilatçılığı ilə “Xüsusi hallar və həssas qruplarla iş: qarşılıqlı fəaliyyətin tənzimlənməsi və səmərəli əməkdaşlıq” mövzusunda “Dəyirmi masa” keçirilib.

“Dəyirmi masa”da BŞTİ-nin müdiri Rəşad Tağıyev, Ailə, Qadın və Uşaq Problemləri üzrə  Dövlət Komitəsinin, Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fondunun, paytaxtın Rayon İcra hakimiyyətlərinin, Bakı şəhər Baş Səhiyyə İdarəsinin, Bakı şəhər Baş Polis İdarəsinin, Təhsildə Araşdırma və İnkişaf Mərkəzinin əməkdaşları, Təhsil Nazirliyi yanında İctimai Şuranın üzvləri, BŞTİ-nin struktur bölmə rəhbərləri, KİV nümayəndələri və digər qonaqlar iştirak ediblər.

Tədbirdə çıxış edən BŞTİ-nin müdiri Rəşad Tağıyev son illərdə ölkəmizdə məktəbyaşlı uşaqlarla əlaqədar baş verən xüsusi hallarla bağlı məsələlərə və həssas qruplarla işə diqqətin artırıldığını və daha konkret yanaşma müşahidə olunduğunu söyləyib. Bildirib ki, 2019-cu ildə Təhsil Nazirliyi tərəfindən xüsusi hallarla bağlı “Qaynar xətt” (146-2) xidməti istifadəyə verilib. İdarə müdiri valideynlərin, məktəb rəhbərlərinin, həmçinin geniş ictimaiyyətin diqqətinin bu məsələyə cəlb edilməsi məqsədilə Təhsil Nazirliyi tərəfindən cari dərs ilindən “Mənimlə danış” sosial kampaniyasına start verildiyini və maarifləndirici videoçarxların ictimaiyyətə təqdim edildiyini bildirib.

BŞTİ-nin müdiri “Xüsusi hallar və həssas qruplarla iş: qarşılıqlı fəaliyyətin tənzimlənməsi və səmərəli əməkdaşlıq” mövzusunda təşkil olunmuş “Dəyirmi masa”nın əhəmiyyəti barədə danışıb. O, qeyd edib ki, “Dəyirmi masa” aidiyyəti qurumlarla mövcud vəziyyəti müzakirə etmək, qarşılıqlı əməkdaşlıq imkanlarına bir daha nəzər salmaq və daha səmərəli işçi platformanın yaradılmasına nail olmaq məqsədlərinə xidmət edir.

Məktəblərdə həssas qrupa daxil edilmə ehtimalı olan şagirdlərin müəyyənləşdirilməsi üçün zəruri işlər görüldüyünü deyən R.Tağıyev həmin şagirdlərin hər biri üçün valideynlərin iştirakı ilə fərdi pedaqoji-psixoloji bərpa planının həyata keçirildiyini də qeyd edib. Eyni zamanda, məktəblərdə valideynlər üçün uşaqların yaş, psixoloji və fizioloji xüsusiyyətlərinə dair maarifləndirmə tədbirlərinin təşkil olunduğunu, valideynlərin məktəb həyatında yaxından iştirakının təmin edildiyini diqqətə çatdırıb.

Sonra “Mənimlə danış” sosial kampaniyası çərçivəsində hazırlanmış maarifləndirici videoçarxlar və BŞTİ-nin xüsusi hallara dair təqdimatı nümayiş olunub.

Tədbirdə çıxış edən Bakı şəhər Baş Polis İdarəsinin bölmə rəisi Məryəm Ömərova, Sabunçu Rayon İcra Hakimiyyəti (RİH) başçısının müavini Rəna Fərəcova, Nizami RİH başçısının müavini Gülnaz İsrafilova, Nəsimi RİH başçısının müavini Gülarə Verdiyeva, Yasamal RİH başçısının müavini Təravət Muradova, Binəqədi RİH başçısının müavini Aygün Əliyeva, Təhsil Nazirliyi yanında İctimai Şuranın üzvləri Nadir İsrafilov və Elvina Kazımzadə, Təhsildə Araşdırma və İnkişaf Mərkəzinin direktoru İlkin Həsənov, Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fondunun əməkdaşı Xətai Nəsibov, Səbail RİH-nin nümayəndəsi  Kəmalə Həşimova çıxışları zamanı həssas qruplarla iş, xüsusi hallarla bağlı yanaşma, müvafiq işçi qrupunun yaradılması və bu sahədə aparılan maarifləndirmə işlərinin daha da genişləndirilməsi barədə danışıblar. Həmçinin bildirilib ki, Azərbaycanda uşaqların layiqli vətəndaş kimi yetişməsi, uşaq hüquqlarının etibarlı təminatı, uşaqlarla bağlı sosial problemlərin həlli baxımından dövlət səviyyəsində hərtərəfli işlər görülür.

“Dəyirmi masa”da xüsusi hallarda daha çevik əməkdaşlıqla bağlı müvafiq təkliflər irəli sürülüb, qarşılıqlı maraq doğuran bir sıra digər məsələlərə aydınlıq gətirilib.