“Müəllim – müqəddəsdir"
Məktəbimizdə 5 oktyabr müəllimlər gününə həsr olunmuş “Müəllim müqəddəsdir” adlı tədbir keçirildi. Tədbirdə məktəbin rəhbər heyəti və müəllimlər iştirak edirdilər. Tədbirin təşkilaçısı məktəbimizin ingilis dili müəllimi İlahə Novruzova ilk öncə bütün müəllim heyətini bu gün münasibətilə təbrik etdi. Tədbir uşaqların ifasında müəllimə həsr olunmuş mahnı ilə başladı. Tədbirdə yuxarı sinif şagirdləri ilə yanaşı ibtidai sinif şagirdləri də iştirak edirdi. Onlar müəllimləri öz şeirləri və musiqi nömrələri ilə təbrik etdilər. Daha sonra çıxış edənlər müəllim, onun cəmiyyətdə, gənc nəslin təlim tərbiyəsində rolu barədə məlumat verdilər. Ulu Öndərimiz Heydər Əliyevin kəlamlarından sitat gətirildi: “Həyatını müəllimliyə həsr edən insanlar, həqiqətən, fədakar, xalqına, millətinə sədaqətli və eyni zamanda qəhrəmanlıq göstərən insanlardır”, “Özünü müəllimliyə həsr etmiş insan ən şərəfli insandır”, “Azərbaycan müəllimləri ən yüksək mənəviyyata, vətəndaşlıq hisslərinə malik olan insanlardır”. Tədbirin sonunda məktəbin direktoru Cəmilə Ramazanova çıxış edərək müəllimləri bu bayram münasibətilə təbrik etdi, onlara işlərində yeni nailiyyətlər, uğurlar arzuladı, tədbirin təşkilatçılarına və tədbirdə iştirak edən şagirdlərə təşəkkürünü bildirdi.
