27 saylı tam orta məktəb Beynəlxalq Olimpiadada
Oktyabrın 30-dan noyabrın 6-dək Türkiyənin Antalya şəhərində məktəblilər və tələbələr arasında VIII Beynəlxalq Olimpiada keçirilib. Olimpiada Rusiya Federasiyasının Antalyadakı baş konsulluğu, Antalya şəhər meriyası, Beynəlxalq Turizm Akademiyası, Beynəlxalq Turizm Kolleci və Antalyadakı Rus Məktəbi tərəfindən təşkil olunub. Olimpiada III-XI sinif şagirdləri və tələbələr arasında riyaziyyat, rus dili, ingilis dili, türk dili, coğrafiya, fizika, kimya, biologiya, təsviri incəsənət və ümumi tarix fənləri üzrə keçirilib. Olimpiadada Rusiya, Ukrayna, Qazaxıstan, Özbəkistan, Azərbaycan və Türkiyə dövlətlərinin 20 məktəbini təmsil edən 200-dən çox şagird iştirak edib. Azərbaycanı bu olimpiadada beş məktəbdən - Avropa Azərbaycan Məktəbi, Akademik Zərifə Əliyeva adına Lisey, Bakı Modern Məktəbi, Bakı şəhəri 27 saylı və 220 saylı orta məktəblərindən olan 72 şagird təmsil edib. Xətai rayon 27 saylı tam orta məktəb tərbiyə işləri üzrə direktor müavini Arzu İbrahimovanın rəhbərliyi ilə V-X siniflərdən olan 10 şagird sözügedən olimpiadada iştirak edib. Olimpiada həm şagirdlərin həm bilik,həm də bacarıqları qiymətləndirildi. Riyaziyyat fənni üzrə olimpiadaya qatılan altı şagirddən ikisi yer tutub.Onlardan biri gümüş (Razim Məmmədli, VII sinif), biri bürünc (Nihat Qənbərli, V sinif) medal qazanıb. İngilis dili fənni üzrə olimpiadaya qatılan üç şagirddən biri yer tutub.(Səma Salmanova,X sinif şagirdi) gümüş medal qazanıb Ümumilikdə isə olimpiadada 10 şagird 4 medal qazanıb.Şahmat turnirində Nihat Qənbərli gümüş medal qazandı. Mirsəid Abbasov ,Fərid Əliyev Razim Məmmədli,Nicat Xanlarov müxtəlif nominasiyalar üzrə qalib oldular.Məktəbi təmsil edən komanda həmçinin diplomlarla,qiymətli hədiyyələrlə mükafatlandırıldı. Bu münasibətlə məktəbdə keçirilən təqdimat mərasimində olimpiyaçılarımız zəngin təəssüratlarla qayıtdıqlarını,böyük təcrübə məktəbi keçdiklərini və gələcək olimpiadalarda hədəflərinin qızıl medal olacağını məktəblilər və müəllimlər qarşısında söz verdilər.
