XV Avropa Gənclər Olimpiya Festivalı ilə əlaqədar olaraq görüş keçirildi
06.02.2019-cu il tarixində Bakı Şəhəri üzrə Təhsil İdarəsində “Olimpiya Mədəniyyəti və Təhsil Proqramı” çərçivəsində 2019-cu ilin 20-28 iyul tarixlərində Bakı şəhərində keçiriləcək XV Avropa Gənclər Olimpiya Festivalı ilə əlaqədar olaraq görüş keçirilib. Görüşdə festivalda iştirak edəcək məktəb direktorları iştirak edirdilər.
Tədbirdə çıxış edənlər XV Avropa Gənclər Olimpiya Festivalında məktəblərin rolu və vəzifələri barədə geniş məlumat verdilər. Eyni zamanda proqramın əsas məqsədinin Avropa Olimpiya Komitəsinə üzv ölkələrin gəncləri arasında mədəniyyət və idmanı, həmçinin Olimpiya hərəkatını təşviq etməkdən ibarət olduğunu bildirdilər.
Bakı Şəhəri üzrə Təhsil İdarəsinin müdiri Rəşad Tağıyev Festivalda ölkəmizi təmsil edən məktəblilərin yüksək nəticələr əldə edəcəyinə və ölkəmizin idman şərəfini layiqincə qoruyacaqlarına inamını ifadə edib.
Müxtəlif ölkələrin təhsil müəssisələri ilə Bakı şəhər məktəbləri arasındakı əməkdaşlığı nəzərdə tutan püşkatma nəticəsində bizim məktəbin öhdəsinə Malta dövlətinin təhsil müəssisəsi ilə əməkdaşlıq etmək düşdü.
