Keyfiyyətin yüksəldilməsi əsas prioritetdir
Məktəbin fəaliyyət planına uyğun olaraq IX sinif şagirdlərinin ümumi orta təhsil , XI sinif şagirdlərinin tam orta təhsil kursu üzrə buraxılış imtahanlarına hazırlıq səviyyəsinin öyrənilməsi və təmayül siniflərində təhsil alan X sinif şagirdləri üçün təşkil edilmiş monitorinqlərin nəticələri I yarımil üçün müzakirə olundu.
Təlim tərbiyə işləri üzrə direktor müavini Səadət Rzayevanın hazırladığı təqdimatda monitorinqlərin nəticələri ilə yanaşı, şagirdlərin illik qiymətləri, buraxılış imtahanlarının nəticələri, təmayül fənləri üzrə aldıqları qiymətlər diaqramların köməyi ilə müqayisəli şəkildə iştirakçılara çatdırıldı.
IX - XI siniflərdə dərs deyən fənn müəllimlərinin, Metodbirləşmə rəhbərlərinin, məktəb rəhbərliyinin iştirakı ilə keçirilən müzakirələrdə mövcud çatışmamazlıqlar və onları yaradan səbəblər müzakirə olundu. Müzakirələrdən sonra qərara alındı ki, tədrisin keyfiyyətinə nəzarətin gücləndirməsi və keyfiyyətin artırılması üçün II yarımildə sınaq imtahanlarında istifadə olunan cavab kartları əsasında hər ay sınaq yoxlamaları keçirilməli, fənn müəllimləri zəif oxuyan şagirdlərlə imtahana hazırlıq məqsədi ilə əlavə məşğələlər keçirməli, şagirdlərin hamısının minimum bilik səviyyəsi təmin olunmalı, Azərbaycan dili, ingilis dili və Riyaziyyat fənn metodbirləşmə iclaslarında tədrisin keyfiyyəti ilə bağlı müzakirələr keçirilməlidir. Bundan əlavə monitorinqin nəticələrinin valideyn iclaslarında müzakirə olunması, buraxılış imtahanlarına hazırlıq məqsədi ilə şagirdlərə psixoloji dəstəyin təmin olunması barədə qərarlar qəbul olundu.
