Vətən müharibəsinin 21-ci günü - 2020-ci il oktyabrın 17-si hərb tariximizə Füzuli şəhərinin və ətraf kəndlərin erməni işğalından azad edildiyi gün kimi yazıldı. Prezident İlham Əliyevin 2023-cü il iyulun 31-də imzaladığı Sərəncama əsasən Füzuli şəhərinin işğaldan azad edildiyi 17 oktyabr tarixi Füzuli Şəhəri Günü kimi qeyd olunur. Düz 4 il əvvəl məhz bu gün Füzuli şəhəri düşmən əsarətindən azad edilib. Həmin əlamətdar hadisə yalnız dahi şairin adını daşıyan rayonun sakinlərində deyil, xalqımızda böyük ruh yüksəkliyi və coşqu yaradıb. Bu məqsədlə məktəbimizin Azərbaycan dili və ədəbiyyat müəllimi Asimə Qubadovanın təşkilatçılığı ilə “Füzuli Şəhər günü”-nə həsr olunmuş dəyirmi masa keçirildi. Dəyirmi masada iştrak edən Arzu Alışqızı çıxış edərək qeyd etdi ki, “Füzuli uğrunda gedən döyüşlər İkinci Qarabağ müharibəsinin cənub-şərq cəbhəsində ən mühüm döyüşlərindən biri idi. Döyüşlərin ilk saatlarından Füzulinin təmas xəttindəki bir neçə müdafiə xəttinin yarılması nəticəsində ordumuz strateji üstünlüklər qazanıb. Hazırda qürur hissi ilə deyə bilərik ki, döyüşlərin ilk günündən igid əsgər və zabitlərimiz doğma torpaqlarımızın azadlığı uğrunda böyük şücaət və qəhrəmanlıq göstərib. Uğurlu Füzuli əməliyyatı ilə, həmçinin Cəbrayıl və Xocavənd rayonunun da bir sıra yaşayış məntəqələri Azərbaycan Ordusu tərəfindən azad edilib.”Şagirdlər tədbirdə vətənpərvərlik ruhunda mahnıları oxudular , şeirlər səsləndirdilər. Sonda Füzuli şəhərinin işğaldan öncə , işğaldan sonar və son quruculuq işlərini əks etdirən videoçarx nümayiş olundu.
