Sadıqov Vüqar Xalıqverdi oğlu 1968-ci il aprelın 15-də Ermənistanın Urud kəndində anadan olmuşdur. Tam orta təhsilini Urud kəndində alan Vüqar 1986-cı ildə Bakı Dövlət Universitetinin mexanika – riyaziyyat fakültəsinə daxil olmuşdur. Birinci kursu bitirdikdən sonra hərbi xidmətə yola düşmüşdür. Hərbi xidmətdən qayıtdıqdan sonra təhsilini davam etdirmişdir.
İlk əmək fəaliyyətinə 1993-cü ildən, Nizami rayonu 238 №-li məktəbdə müəllim kimi başlamışdır. 1 ay işlədikdən sonra könüllü olaraq Qarabağ uğrunda gedən döyüşlərdə iştirak etmək üçün ön cəbhəyə yola düşmüşdür. 1994-cü il yanvarın 13-də Yuxarı Salahlı kəndində gedən döyüşlərdə qəhrəmancasına həlak olmuşdur. Yanvarın 15-də onun cənazəsi valideynlərinə təhvil verilmişdir. 2002-ci ildən məktəbimiz Vətənimizin şəhid oğlu Vüqar Sadıqovun adını daşıyır. Xalqımız öz qəhrəman övladı ilə fəxr edir.