Ümumdünya Psixi Sağlamlıq Günü
10.10.2022-ci il tarixində N.Həmidov adına 208 nömrəli tam orta məktəbin psixoloqu və UBTR tərəfindən "Uşaqların fiziki inkişafında psixi sağlamlığın rolu” adlı maarifləndirici söhbət keçirildi. Dərs Ümumdünya Psixi Sağlamlıq Gününə həsr olunmuşdu. Onlar qeyd etdilər ki, Ümumdünya Psixi Sağlamlıq Gününün qeyd olunması psixi sağlamlığın problemləri, onun möhkəmləndirilməsi və profilaktik üsulları barədə ictimaiyyətin məlumatlılığının artırılması məqsədini daşıyır. Psixi sağlamlıq insanın öz qabiliyyətlərini reallaşdıra bildiyi, adi həyat streslərinin öhdəsindən gəldiyi, səmərəli çalışdığı vəziyyətdir. Konkret məqamda insanın psixi sağlamlıq səviyyəsi bir çox sosial, psixoloji və bioloji amillərdən asılı olur. Dünya üzrə faktlar göstərir ki, davamlı sosial-iqtisadi təzyiq, yoxsulluq, o cümlədən təhsil səviyyəsinin aşağı olması həm ayrı-ayrı fərdlər, həm də icmalar üçün psixi sağlamlığın risk amillərinə aiddir. Sürətli sosial dəyişikliklər, işdə stres vəziyyəti, gender ayrı-seçkiliyi, sosial təcrid, qeyri-sağlam həyat tərzi, zorakılıq təhlükəsi, fiziki xəstəliklər, eləcə də insan hüquqlarının pozulması da psixi sağlamlığın pozulmasını şərtləndirən amillərə aid edilir. Şagirdlərlə keçirilən maarifləndirici söhbətin sonunda onlara bu haqda video çarxlar nümayiş etdirildi və onların da bu mövzuda düşüncələri dinlənildi.
