Müəllim ömrü
Müəllimlik dünyada ən çətin, eyni zamanda ən şərəfli və ən ğözəl peşədir. Bu gözəl və şərəfli işin dəyərini bilən əcdadlarımız həmişə müəllimə hörmətlə yanaşmışlar.Müəllimlər şagirdlərin dərin və hər tərəfli bilik almaları, yaşadıqları dövrün problemlərindən baş çıxarmaları üçün bütün bilik və bacarıqlarını sərf edirlər. Valideynlə bərabər, bəlkə də, ondan daha çox, uşağın hər cür şıltaqlığına, əziyyətinə dözmək, kədəri ilə kədərlənib, sevinci ilə sevinmək müəllimlərin üzərinə düşən ağır yükdür. Müəllimlər yeni cəmiyyət quruculuğunun memarlarıdır. Hər birimizin layiqli vətəndaş kimi yetişməyində müəllimlərimizin əvəzsiz xidmətləri olmuşdur. Ümummilli liderimiz Heydər Əliyev həmişə müəllim əməyini yüksək qiymətləndirmiş, müəllim haqqında xoş sözlər söyləmişdir. O, deyirdi: "Hər birimizdə müəllimin hərarətli qəlbinin bir zərrəciyi vardır. Məhz müəllim doğma yurdumuzu sevməyi, hamının rifahı namınə vicdanla işləməyi müdrikliklə və səbirlə bizə öyrətmiş və öyrədir". 4 oktyabrda məktəblərimizdə bu qiymətə layiq olan, öz sənətini ürəkdən sevən, yüksək peşəkarlığı ilə fərqlənən, cəmiyyətin onların qarşısında qoyduğu vəzifəni şərəflə yerinə yetirən müəllimlər üçün məktəbimizin musiqi müəllimi Rəna Hacıyevanın rəhbərliyi ilə “ Müəllim ömrü” adlı tədbiri baş tutdu.Tədbiri məktəbin direktoru Nailə Əhmədova açdı.” Müəllim - ilk növbədə insandır, bilikli, savadlı, tərbiyəli, uşaqları və peşəsini sevən , uşaqları, gəncləri xalqın, vətənin gələcəyi üçün hazırlayan vətənpərvər insandır, vətəndaşdır, ictimai xadimdir. Müəllim gənc nəslin mənəvi aləminin memarı, cəmiyyətin etibar etdiyi şəxsdir. Cəmiyyət ən əziz, ən qiymətli sərvətini - uşaqları, öz ümidini, öz gələcəyi olan uşaqları müəllimə etibar edir.” Nailə Əhmədova tədbirdə olan müəllim kollektivini “Beynəlxalq müəllimlər günü” münasibəti ilə təbrik edərək, bu çətin şərəfli peşədə böyük uğurlar dilədi. Sonra tədbir məktəbin şagirdləri tərəfindən hazırlanan proqramla davam etdirildi. Sonda Nailə Əhmədova məktəbin ictimai həyatında öz fəallığı ilə fərqlənən müəllimlərə: Zümrüd Cəbiyeva, Rəna Hacıyeva, Ələddin Cəfərov və Aslan Kərimlini Fəxri fərmanla təltif edərək onlara uğurlar dilədi.
