Xocalı soyqırımının otuzillik ildönümü
Müharibə bəşəriyyətin ən pis xəstəliyi, soyqırım isə heç sağalmayan yarasıdır. Bu cür işğalçı qəsbkarlıq qan-xəta, ölüm-itim, fəlakət, dağıntı və dəhşətli faciələri ilə yadda qalır. Ona görə də yaraları dərin və sağalmaz iz buraxır. Tarixin elə ağrı-acılı, qanlı-qadalı səhifələri olub ki, onların dəhşətləri zaman keçdikcə üzə çıxır, yaralarından qan süzülür, sağalmasına heç bir ümid qalmır. Elə Xocalı müsibəti kimi!
"Xocalı soyqırımının otuzillik ildönümü ilə" əlaqədar məktəbin ibtidai sinif müəllimi Almaz Nəsiblı ədəbi-bədii kompozisiya hazırladı. Tədbir Azərbaycan Dövlət Himni ilə başladı. Daha sonra şəhidlərin, o cümlədən Xocalı soyqırımı qurbanlarının əziz və unudulmaz xatirəsi bir dəqiqəlik sükutla yad olundu. Məktəbin müvəqqəti direktor səlahiyyətlərini icra edən Əzizə Kərimova çıxış edərək bildirdi ki, Xocalı qətliamı Azərbaycan xalqının tarixində erməni faşistlərinin insan təfəkkürünə sığmayan vəhşiliklərinin qanlı izidir. Faciəni əks etdirən kadrlar hər an bu dəhşətli mənzərəni seyr edənləri sarsıdır, sızladır. Meşələrdə əli, ayağı, burnu, qulağı donan, əsir və girov düşən qoca və uşaqların bizim könüllü milli müdafiə əsgərlərinə təhvil verilməsi səhnəsi yüz il bundan sonra da ən möhkəm iradəli insanları belə sarsıdacaq, yandırıb-yaxacaqdır və heç vaxt heç kimin yaddaşından silinməyəcək. Almaz Nəsibli xalqımızın başına gətirilən faciələrlə bağlı fikirlərini şagirdlərlə bölüşərək onları torpaqlarımızın bütövlüyü və azadlığı uğrunda mübarizəyə səslədi.Sonra şagirdlər Xocalı faciəsinin ağrılarını, düşmənə qarşı nifrət hisslərini vətənpərvərlik ruhunda səsləndirdikləri şeirlər, ədəbi-bədii kompozisiyalar və mahnılar vasitəsilə ifadə etdilər.
