12 Noyabr Konstitusiya Günü münasibətilə sinif təşkilatı saatları keçirilib
12 Noyabr Konstitusiya Günü münasibətilə sinif təşkilatı saatları keçirilib.
Sinif təşkilatı saatlarında çıxış edənlər müstəqil Azərbaycanın əsas qanunu – 12 Noyabr Azərbaycan Respublikası Konstitusiyasının qəbul olunduğu günlə əlaqədar tədbir iştirakçılarını təbrik etdilər, bu hadisənin Ulu Öndərin Azərbaycan xalqına və dövlətçiliyinə göstərdiyi tarixi xidmətlərdən biri olduğunu vurğuladılar. Bildirildi ki, ümummilli lider Heydər Əliyevin ölkəmizdə ikinci dəfə hakimiyyətə gəlişindən sonra Konstitusiya layihəsi üzərində ciddi iş başlandı. Belə ki, 1918-1920-ci illərdə mürəkkəb geopolitik şəraitdə fəaliyyət göstərməyə məcbur olmuş Azərbaycan Xalq Cümhuriyyəti bir çox obyektiv və subyektiv amillər səbəbindən müstəqil dövlətimizin Konstitusiyasını hazırlayıb qəbul edə bilməmişdi. Sovetlər dönəmində xalqımıza qəbul etdirilmiş “Konstitusiya” lar isə nə Azərbaycanın dövlət quruculuğunun tələblərinə, nə azadlıq və müstəqillik amallarımıza, nə də xalqımızın milli-mənəvi ruhuna cavab vermirdi. Bu səbəbdən 1994-cü ildə ulu öndər Heydər Əliyevin sədrliyi ilə Konstitusiya komissiyası fəaliyyətə başladı və layihə 1995-ci ildə ümumxalq müzakirəsinə verildi. 1995-ci il noyabrın 12-də ümumxalq referendumu ilə müstəqil Azərbaycan Respublikasının ilk Konstitusiyası qəbul olundu. Ümumxalq referendumu əsasında qəbul edilmiş Konstitusiya qabaqcıl dünya təcrübəsinə, qanun yaradıcılığı prinsiplərinə, çoxəsrlik dövlətçilik ənənələrimizə əsaslanır. Ümummilli liderimiz Heydər Əliyevin yaradıcısı olduğu, milli və ümumbəşəri dəyərləri özündə əks etdirən bu sənəd haqlı olaraq hər bir azərbaycanlıda, bütün vətəndaşlarımızda qürur və iftixar hissi doğurur.
Şagirdlərimizin Azərbaycan Respublikası Konstitusiyası haqqında biliklərini daha da dərinləşdirmək məqsədilə şagirdlərlə sual-cavab aparılmışdır.
