Şəhid Kamran Yaqubovun anım günü
Bütün yüksəkliklərdən ucada dayanan bir zirvə var: Şəhidlik zirvəsi. Bu yüksəkliyə ucalan insanlar ölmürlər, əksinə ölümləri ilə bir əbədilik qazanırlar. Məktəbimizin adını daşıdığı Kamran Novruz oğlu Yaqubov 1974-cü il iyun ayının 28-də Bakı şəhərində anadan olub. 1981-ci ilin sentyabr ayında 184 nömrəli tam orta məktəbin I sinfinə gedib. Məktəbdə oxuduğu müddətdə hər zaman ərzində nizam-intizamı ilə seçilib. 1992-ci ildə 184 nömrəli tam orta məktəbin XI sinfi bitirib. Qaradağ rayonundan hərbi xidmətə çağırılıb.
Abşeron rayonundakı hərbi hissədə bir müddət hərbi xidmət keçdikdən sonra 1993-cü ildə Ağdam döyüşlərində iştirak edib. Bu döyüşlərdə böyük şücaət göstərmiş K.Novruzov döyüşlərin birində düşmən atəşinə tuş gələrək şəhid olub. Güzdək kənd qəbiristanlığında dəfn olunub.
1996-cı ildə Bakı Şəhər Təhsil İdarəsinin tabeliyindəki 184 nömrəli tam orta məktəbə şəhid Kamran Yaqubovun adı verilib.
Hər il olduğu kimi bu il də məktəbimizdə şəhid Kamran Yaqubovun anım günü keçirildi. Anım günündə şəhidin ailə üzvləri, məktəb rəhbərliyi, müəllimlər və şagirdlər çıxış edərək, şəhid Kamran Yaqubovu yad etdilər.
