20 Yanvar faciəsi ilə bağlı müəllimlərin dəyirmi masası
Liseyimizdə Bakı Şəhəri üzrə Təhsil İdarəsinin "20 Yanvar faciəsinin otuzuncu ildönümü ilə bağlı Tədbirlər Planı"na əsasən, keçrilən silsilə tədbirlərin davamı olaraq lisey rəhbərliyi və müəllim kollektivinin iştirakı ilə elmi-kütləvi mövzuda dəyirmi masa keçirildi. Liseyin direktoru, filologiya üzrə fəlsəfə doktoru Arif Əsədov tədbiri açıq elan edərək faciə haqqında ətraflı məlumat verdi. Liseyin təlim-tərbiyə işləri üzrə direktor müavini Vüsalə Babayeva, tərbiyə işləri üzrə direktor müavini Alimə Seyfullayeva, tarix müəllimi Sevinc Həsənova, tarix müəllimi Güntəkin Məmmədova, Azərbaycan dili və ədəbiyyat müəllimi Könül Mirzəyeva, rus dili və ədəbiyyatı müəllimi Məhəbbət Dadaşova, texnologiya müəllimi Gülsüm İbrahimova, liseyin psixoloqu Gülnarə Əhmədova tədbirdə çıxış etdilər. Onlar bu hadisəyə müxtəlif mövzulardan yanaşdılar . Belə ki, Sevinc Həsənova 20 Yanvar faciəsinin xarici mətbuatda işıqlandırılması və faciə haqqında mətbuatda qeyd olunan faktlardan söz açdı. O, faciənin nə qədər acı, nə qədər dözülməz olduğunu, neçə-neçə cavanların tanklar altda əzildiyini, neçə ailənin başsız qaldığını, neçə ailənin dağıldığını qeyd etdi. Ancaq həmin dövürdə bu faciəni törədənləri başa çəkmələri və onlara daha da yüksək ad verildiyini təəssüf hissi ilə vurğuladı. Daha sonra Məhəbbət müəllimə çıxış edərək faciənin Rusiya mətbuatında necə dərc olunduğundan danışdı. O bu faciənin başlanğıcının hələ həmin illərdən çox qabaq planlaşdırıldığını qeyd etdi.
Liseyin texnologiya müəllimi Gülsüm müəllim bu dəhşətli faciənin canlı şahidi olaraq faciənin nə qədər ağrılı, acılı olduğundan söz açdı. Gülsüm xanım həmin dövrdə çalışdığını və faciə günlərində heç nədən qorxmadan hər gün öz işinə getdiyini, o dövrdəki çətinlikləri, faciədən bir neçə gün sonra şəhərdə davam edən hadisələri olduğu kimi xatırladığını bildirdi. O bu faciədən çox təsirlənmiş və həmin gecə "Şəhidlərimiz və şahidlərimiz" adlı bir poema yazmşdır. Müəllim poemanı səsləndirdi və qeyd edirik ki, əsərin sətirlərində sanki həmin şənbə gecəsi canlanırdı.
Azərbaycan dili və ədəbiyyat müəllimi Könül Mirzəyeva qanlı faciənin Azərbaycan ədəbiyyatında canlandırılmasından söz açdı. O gecənin şairlərimizin, yazıçılarımızın əsərlərində, poemalarında, şeirlərində öz əksini tapdığını qeyd etdi. Bir çox ədiblərimiz faciəni ürək ağrısı ilə qələmə alaraq gələcək nəsillərə əsərlər, şeirlər, poemalar şəklində ötürülməsini, bu əsərlər, poemalar vasitəsilə gələcək nəsillərin daha çox məlumatlanmasından danışdı.
Daha sonra liseyin psixoloqu Gülnarə xanım həmin dövrün canlı şahidlərindən biri kimi faciə haqqında geniş məlumat verdi. O qeyd etdi ki, təkcə bu faciə ərzində deyil, zaman-zaman xalqımızın başına mənfur düşmənlərimiz oyunlar açmışlar, xalqımızı məhv etməyə çalışmışlar. Ancaq buna baxmayaraq bizi öz azadlıq yolumuzdan döndərə bilməmişlər. Gülnarə xanım çıxışında qeyd etdi ki, biz bu faciə, eləcə də tariximizi gənc nəsillərə olduğu kimi başa salmalı, onları vətənpərvərlik ruhunda tərbiyə etməliyik.
Azərbaycan incəsənətində və mədəniyyətində 20 Yanvar faciəsinin yeri və rolu mövzusunda liseyimizin tarix müəlimi Güntəkin müəllim çıxış edərək bu dəhşətli faciənin bəstəkarlarımızın, rəssamlarımızın, eləcə də digər incəsənət nümayəndələrinin sənət əsərlərində də öz əksini tapdığını bildirdi. Müəllim xüsusi olaraq bildirdi ki, bu faciəyə siyasi qiymətin verilməsi, şəhidlərin xatirəsinə əbədi məşəl kompleksinin tikintisənə başlanması və eləcə də digər bu kimi tədbirlərin görülməsi Ümumilli liderimiz Heydər Əliyevin hakimiyyəti illərində dahi rəhbərin göstərişi ilə olmuşdur.
Dəyirmi masa iştirakçıları istər bu faciənin, istərsə də xalqımızın başına açılan digər faciələrin mahiyyətinin gənc nəsillərə düzgün məzmunda çatdırılması, onların vətənpərvərlik ruhunda tərbiyə olunmasını özlərinə bir vətəndaşlıq borcu bildiklərini qeyd etdilər.
