Əfqan Əliyev Məhmətulla oğlu
1964-cü il yanvar ayının 10-da Bakı şəhəri, Buzovna qəsəbəsindəki Əliyevlər ailəsində Əfqan Əliyev dünyaya gəlib.1971-ci ildə 125 nömrəli məktəbin I-ci sinfinə qəbul olub, 1979-cu ildə həmin məktəbin VIII-ci sinfini bitirib. Təhsilini həmin qəsəbədəki 55 nömrəli Texniki Peşə Məktəbində “Avtomobil çilingəri” ixtisası üzrə davam etdirib. Məktəbi bitirdikdən sonra ordu sıralarına çağırılıb. Tümen şəhərində qulluq edib, ordudan qayıdandan sonra Mərdəkan qəsəbəsindəki Makaron fabrikində işləyib. Fabrikdə işlədiyi müddətdə kollektiv arasında öz işgüzarlığı, mehribanlığı və səmimiliyi ilə hamının sevimlisi olmuşdur.
Erməni təcavüzkarları Azərbaycan torpağına hücum etdiyi illərdə Əfqan Vətənin müdafiəsinə qalxıb, 1993-cü ilin noyabrında Ağdam bölgəsinə torpaqlarımızın bütövlüyü uğrunda döyüşlərdə iştirak edir. Əfqan Əliyev torpaqlarımızın azadlığı uğrunda gedən döyüşlərdə fəal iştirak edib. Yaralı döyüşçü dostlarını döyüş meydanından çıxararkən,1994-cü ilin yanvarın 20-də xain düşmən gülləsinə tuş gəlib. Əfqan Əliyev doğulub, böyüyüb, başa çatdığı Buzovna qəsəbəsindəki qəbirstanlığında dəfn edilib.
Hal-hazırda Buzovna qəsəbəsindəki 125 nömrəli məktəb Əfqan Əliyevin adını daşıyır.