Aşıq Ələsgərin həyat və yaradıcılığına həsr olunmuş konfrans keçirildi
Akademik Xoşbəxt Yusifzadə adına 112 nömrəli tam orta məktəbin təşkilati işlər üzrə direktor müavini İlahə Abdullazadənin təşkilatçılığı ilə "Aşıq Ələsgərin 200 illik yubileyinin qeyd edilməsi haqqında" Azərbaycan Respublikası Prezidentinin sərəncamına və Bakı Şəhəri üzrə Təhsil İdarəsinin F-171 nömrəli əmrinin "Ustad sənətkar Aşıq Ələsgərin həyat və yaradıcılığına həsr olunmuş konfransların keçirilməsi " mövzusuna uyğun olaraq məktəbin akt zalında AŞIQ ƏLƏSGƏRİN 200 İLLİK YUBİLEYİNƏ həsr olunnuş xüsusi konfrans keçirildi.
Tədbirdə VMA və KA prezidenti Sərxan Şahverdiyev, T.T.İ işləri üzrə direktor müavini Lətifə Mustafayeva, müəllimlər və şagirdlər iştirak edirdilər.
Ədəbiyyat müəllimləri Ulduz Qafarova, Elnarə Məmmədova və Şəntürk Mirzəyeva çıxış edərək Aşıq Ələsgərin həyat və yaradıcılığı haqqında məlumat verib bildirdilər ki, Aşıq Ələsgər aşıq sənətinin ideya-məzmun və sənətkarlıq baxımından zənginləşməsində böyük rol oynamışdır.Aşıq şeirinin bir çox janrlarının ilk nümunələrini ortaya çıxarmışdır.Aşıq Ələsgər çoxəsrlik keçmişə malik aşıq sənəti ənənələrinə ən yüksək bədii-estetik meyarlarla yeni məzmun qazandırmış, xalq ruhuyla həmahəng əsərləri ilə Azərbaycanın mədəni sərvətlər xəzinəsinə misilsiz töhfələr bəxş etmişdir. Sənətkarın doğma təbiətə məhəbbət və vətənpərvərlik hisslərini vəhdətdə aşılayan, ana dilimizin saflığını, məna potensialını və hüdudsuz ifadə imkanlarını özündə cəmləşdirən dərin koloritli yaradıcılığı Azərbaycan ədəbiyyatının parlaq səhifələrindəndir. Aşıq Ələsgər çox sayda yetirmələrindən ibarət bir məktəb formalaşdırmış və gələcəyin məşhur el şairlərinə qüvvətli təsir göstərmişdir. Azərbaycan aşıq sənətinin ümumbəşəri dəyərlər sırasında qorunan dünya qeyri-maddi mədəni irs nümunələri siyahısına salınması həm də Aşıq Ələsgər sənətinə ehtiramın təzahürüdür.
Şagirdlər öz çıxışlarında Aşıq Ələsgərin doğma təbiətə məhəbbət və vətənpərvərlik hisslərini vəhdətdə aşılayan, ana dilimizin saflığını və hüdudsuz ifadə imkanlarını özündə cəmləşdirən bir sənətkar olduğunu vurğuladılar. Tədbirdə aşığın şeirləri və sözlərinə yazılmış mahnılar səsləndirildilər.
