GİS GÜNÜ tədbiri keçirildi
14 noyabr 2018-ci il tarixində Xəzər Universitetində Təhsildə inkişaf və innovasiyalar üzrə 2-ci qrant müsabiqəsinin qalibi olmuş Bakı şəhəri 78 nömrəli tam orta məktəbin “Ümumtəhsil müəssisələrində Coğrafi İnformasiya Sistemlərinin (CİS) tətbiqi ilə coğrafiya fənnini tədris edəcək müəllimlərə təlim” adlı layihəsi çərçivəsində “GİS GÜNÜ” tədbiri keçirildi. Əsası 1999-cu ildə ABŞ-da qoyulan CİS Günü sonradan digər ölkələrdə də keçirilməyə başlanılıb. CİS Günü “ESRİ” şirkətinin prezidenti və qurucusu, coğrafi informasiya sistemləri və coğrafi məlumat bazasının idarə edilməsi proqram təminatlarının beynəlxalq təchizatçısı Cek Dangermond tərəfindən təsis edilib. Hazırda dünyada 74 ölkə CİS Gününü qeyd edir
Tədbirdə Bakı şəhəri üzrə ümumtəhsil məktəblərindən online sorğu əsasında seçilmiş iştirakçı müəllimlər, layihə komandasının üzvləri: layihə rəhbəri, 78 nömrəli tam orta məktəbin direktoru Murad Zeynalov; layihə koordinatoru, CİS mütəxəssisi Samir Vəlizadə, Coğrafiya İnstitutunun dissertantı, CİS mütəxəssisi Elvin Əmrahov və təlimçi müəllim: Coğrafiya İnstitutunun doktorantı, ABC - Azerbaijan British College-in coğrafiya müəllimi Arzu Əhmədova; Xəzər Universitetinin Coğrafiya və Ətraf Mühit Departamentinin rəhbəri Rövşən Abbasov; Caucasus GEO Survey şirkətinin rəhbəri və CİS eksperti Rauf Əmənov; Coğrafiya üzrə fəlsəfə doktoru, Xəzər Universitetinin müəllimi, Caspian Geomatik şirkətinin rəhbəri Elvin Alıyev; Coğrafiya İnstitutunda Geoinformatika və Kartoqrafiya şöbəsinin rəhbəri Yaşar Nəsibli; Coğrafiya İnstitutunun elmi işçiləri; Bakı Dövlət Universiteti, Xəzər Universitetinin magistrant və doktorantları iştirak edirdi
İlk öncə layihə rəhbəri, 78 nömrəli tam orta məktəbin direktoru Murad Zeynalov gələn qonaqları salamladı, layihə haqqında ətraflı məlumat verdi: Ümumtəhsil məktəblərində coğrafiya müəllimlərinin fənnin tədrisi zamanı CİS texnologiyalarından istifadə etmələri fənni praktiki olaraq asan öyrədilməsində son dərəcə əhəmiyyətli olduğunu vurğuladı. Qeyd etdi ki, 2017-ci ilin oktyabr-noyabr aylarında Bakı şəhəri 78 nömrəli tam orta məktəbdə reallaşan “Ümümtəhsil məktəblərində coğrafiya fənninin coğrafi informasiya sistemləri (CİS) ilə tədrisi” layihəsinin icrası göstərdi ki, qeyd olunan texnologiya ilə tədrisin təşkili təlim prosesində praktik vərdişlərə yiyələnmənin effektivliyini artırmış olur və eyni zamanda, şagirdlərin coğrafiya fənninə olan marağının artmasını təmin edir
Tədbirdə qonaqların çıxışları dinlənildi və qeyd edildi ki, təhsilə göstərilən dövlət qayğısı nəticəsində məktəblərin maddi-texniki bazası (kompüter, ağıllı lövhələr, tabletlər və s.) CİS-in istifadə edilməsinə təminat verir. Bu baxımdan, məktəblərin texniki təchizatının yaxşılaşdırılması CİS-in tətbiq imkanlarını artırır. Xüsusilə vurğulamaq olar ki, CİS-in tətbiqinin üstünlüklərindən biri bu zaman şagirdlər tərəfindən əzbərləmə yerinə mövzunun birbaşa icra edilərək öyrənilməsi imkanının olmasıdır
Tədbirin sonunda layihə komandası tədbir iştirakçıları ilə xatirə şəkli çəkdirdi.
