Pedaqoji Şura: "Son zəng" tədbirinə hazırlıq
2 iyun 2025-ci il tarixində məktəbimizdə pedaqoji şuranın növbəti iclası keçirildi.
İclasda Azərbaycan Respublikası Elm və Təhsil Nazirliyinin tabeliyində fəaliyyət göstərən Məktəbəqədər və Ümumi Təhsil üzrə Dövlət Agentliyinin Bakı Şəhəri üzrə Təhsil İdarəsindən daxil olmuş 27.05.2025-ci il tarixli, 3-29-59/2-2375/2025 nömrəli məktuba əsasən “Son zəng” tədbirinin təşkili ilə bağlı müəyyən edilmiş tələblər müzakirə olundu və aşağıdakı qərarlar qəbul edildi:
Tədbirin tarixi və yeri:
"Son zəng" tədbirinin 14 iyun 2025-ci il tarixində, saat 10:00-da keçirilməsi qərara alındı.
Tədbirin ssenarisi və məzmunu:
Tədbirin ümumi gedişi və ssenarisi məktəbin təşkilat komitəsi tərəfindən hazırlanacaq. Dövlət Himninin səsləndirilməsi, Azərbaycan bayrağının ucaldılması, rəhbərliyin və məzunların çıxışları, həmçinin şagirdlərin bədii-musiqili təqdimatları nəzərdə tutulur.
Təhlükəsizlik və intizam:
Məktəb ərazisində tam təhlükəsizlik və nizam-intizam üçün zəruri nəzarət tədbirləri həyata keçiriləcək.
Valideyn iştirakı:
İştirak edəcək valideynlərin sayı əvvəlcədən müəyyən ediləcək və onlara tədbirin qaydaları yazılı və şifahi şəkildə çatdırılacaq.
Foto və video çəkiliş:
Rəsmi çəkilişlər məktəb rəhbərliyinin nəzarəti altında həyata keçiriləcək. Şagirdlər və valideynlər bu barədə əvvəlcədən məlumatlandırılacaqlar.Pedaqoji şura yekdil şəkildə qərara aldı ki, “Son zəng” tədbiri yalnız müəyyən olunmuş qaydalara əsasən, təhlükəsizlik və etik davranış normalarına ciddi riayət edilməklə təşkil olunmalıdır. Məktəb kollektivi bu prosesə məsuliyyətlə yanaşmalı, tədbirin yüksək səviyyədə və yadda qalan şəkildə baş tutmasına birlikdə töhfə verməlidir.
