319 №-li tam orta məktəb

     Oktyabrın 1-dən 2024-2025-ci tədris ili üzrə məktəbəhazırlıq qruplarında məşğələlər başlayıb. Təhsil həyatına ilk qədəmlərini atan gələcək şagirdlərimizi məktəbin müdriyyəti və müəllimləri böyük sevinclə qarşılamışlar. Direktor Gülmirə Muxtarova və direktor müavini Cəmilə Əkbərova siniflərdə olmuş, yeni gələn uşaqlarla görüşmüş, onların həyəcanına şərik olmuş, həm müəllimləri, həm də valideynləri təbrik etmişlər. Gələcək təhsil həyatınız uğurlu olsun, əziz balalar!

     27 sentyabr Anım Günüdür. Bu qürurlu və şərəfli gün məktəbimizdə də qeyd edildi. 44 günlük 2-ci Qarabağ savaşında torpaqlarımızın azadlığı uğrunda canından keçən əsgər və zabitlərimizin xatirəsi dərin ehtiramla yad edildi. Bu gün  məktəbin bütün siniflərində müxtəlif anım tədbirləri keçirilmiş, şəhidlərin məzarları ziyarət edilmiş, ailələri ilə görüşlər keçirilmişdir. Xalqımızın şərəf tarixini yazan igidlərimizin ruhları qarşısında baş əyirik.Allah rəhmət eləsin!

Oktyabrın 1-də dövlət ümumi təhsil müəssisələrindəki məktəbəhazırlıq qruplarında məşğələlərə start verilib.

2024-2025-ci tədris ilində Bakı Şəhəri üzrə Təhsil İdarəsinin tabeliyindəki 287 ümumi təhsil müəssisəsinin məktəbəhazırlıq qruplarına 23 438  uşaq qeydiyyatdan keçib.

Qeyd edək ki, dövlət ümumi təhsil məktəblərində yaradılan məktəbəhazırlıq qruplarında həftədə 4 gün olmaqla 12 məşğələ keçirilir. Məktəbəhazırlıq qruplarında dərs məşğələləri “Ətraf aləmlə tanışlıq”, “Savad təliminə hazırlıq və nitq inkişafı”, “Bədii təfəkkürün inkişafı”, “Məntiqi və riyazi təfəkkürün inkişafı”, “Təsviri fəaliyyət”, “Musiqi” və “Fiziki mədəniyyət”dən ibarətdir.

Onu da qeyd edək ki, məktəbhazırlıq qruplarının yaradılmasında məqsəd 5 yaşlı uşaqların hazırlığı ilə əlaqədar psixoloji dayanıqlığını artırmaq, təhsil mühitinə uyğunlaşdırmaq, onların ünsiyyət və birgə fəaliyyət bacarıqlarına yiyələnməsini təmin etməkdən ibarətdir.

Bakı Şəhəri üzrə Təhsil İdarəsinin (BŞTİ) tabeliyindəki ümumi təhsil müəssisələrində 27 Sentyabr - Anım Günü ilə bağlı tədbirlər təşkil olunub.

Qalibiyyət və vətənpərvərlik ruhunda təşkil edilən tədbirlərdə Vətən Müharibəsi şəhidlərinin əziz xatirəsi bir dəqiqəlik sükutla yad edilib, Anım Günü barədə şagirdlərə ətraflı məlumat verilib.

Bildirilib ki, Prezident İlham Əliyevin 2020-ci il 2 dekabr tarixli Sərəncamına əsasən təsis edilən Anım Günü Vətən Müharibəsində qəhrəmancasına döyüşən, ölkəmizin ərazi bütövlüyü uğrunda canlarından keçən əsgər və zabitlərimizə, bütün şəhidlərimizə dərin ehtiramın ifadəsidir.

Tədbirlərdə, həmçinin Vətən Müharibəsində qazanılan qələbədən sonra Qarabağda böyük abadlıq və quruculuq işlərinin başlanması, işğaldan azad edilən torpaqlarımızın yenidən bərpa olunması, dövlət başçısının Sərəncamına əsasən, hər il sentyabrın 20-nin Azərbaycan Respublikasında Dövlət Suverenliyi Günü kimi qeyd edilməsi barədə məlumatlar şagirdlərin diqqətinə çatdırılıb.

Qeyd edək ki, təhsil müəssisələrində şәhidlәrin xatirәsinә hәsr olunan ağacәkmә kampaniyaları və şәhidlәrin ailәlәri ilә görüşlәr də keçirilib. Bundan başqa, şagirdlərin Vətən Müharibəsi Memorial Kompleksinə, Hәrbi Qәnimәtlәr Parkı, Şəhidlər Xiyabanı və İkinci Fəxri Xiyabana ekskursiyaları da təşkil olunub.

Məktəbimizin təlim tərbiyə işləri üzrə direktor müavini Cəmilə Əkbərova 2024- 2025 - ci tədris ili üçün dərsdənkənar və dərnək məşğələlərinin cədvəli üzrə müəllimlərə təlimatlar verdi.Dərnək təhsilalanların mövcud potensiallarının inkişafı, dünyagörüşünün genişlənməsi üçün lazımi şəraitin yaradılması, tədris proqramları əsasında qazandıqları bilik və bacarıqların artırılması və inkişafına kömək məqsədilə yaradılır.