286 №-li tam orta məktəb

    24.04.2024-cü il tarixində kitabxanada “Ümumdünya Kitab və Müəlliflik Hüququ Günü" ilə əlaqədar olaraq 3 “ə” sinif şagirdlərinin iştirakı ilə “Ən yaxın dostun kitab olsun” başlığı altında tədbir keçirildi. Tədbirdə şagirdlər oxuduqları nağılların məzmunundan bəhs edib, alınan nəticələri öz fikirləri ilə izah etdilər. Tədbir iştirakçıları kitab oxumağın və mütaliənin davamlı olmasının vacibliyindən söhbət açdılar.

Bakı Şəhəri üzrə Təhsil İdarəsinin tabeliyindəki ümumi təhsil müəssisələri üzrə I sinfə qəbul prosesində prioritet tətbiq olunacaq məktəblərin siyahısı açıqlanıb.

Belə ki, məktəblərə şagird qəbulu sərbəst formada və prioritetə (üstünlük hüququ) əsasən aparılacaq. Sərbəst formada şagird qəbulu aparılan məktəblərə valideynlər şəxsi kabinet vasitəsilə məktəb və müəllim seçimini birbaşa edəcəklər. Prioritet (valideyn və ya uşağın məktəbin müəyyənləşdirilmiş ərazisinə (dislokasiya) qeydiyyatı olmalı, bacı-qardaşı həmin məktəbdə hazırda təhsil almalı, valideynlərindən biri həmin məktəbdə çalışmalı) üzrə valideynlər isə ilk növbədə müəyyən edilmiş müddətdə (Azərbaycan bölməsi üzrə 3 may-3 iyun 2024-cü il, tədrisi digər dillərdə aparılan bölmələr üzrə isə 12 iyun-12 iyul 2024-cü il tarixlərində) üstünlük hüquqlarından biri əsasında  sorğu yerləşdirə bilərlər. Prioritetlərin tətbiqi yaşayış sıx olan ərazilərdə valideynlərin məktəb seçimini asanlaşdırmaq məqsədlərinə xidmət edir.

Qeyd edək ki, müvafiq müddət başa çatdıqdan sonra üstünlük hüququ tətbiq olunan məktəblərdə boş qalan şagird yerlərinə sərbəst qəbul (tədrisi digər dillərdə olan və müsabiqə yolu ilə qəbul aparılan liseylər istisna olmaqla) aparılacaq.

Məlum olduğu kimi, mayın 1-də 2024-2025-ci tədris ili üzrə ümumi təhsil müəssisələrinin birinci siniflərinə şagird qəbulu üzrə uşaqların qeydiyyatına www.mektebeqebul.edu.az elektron portalı vasitəsilə start veriləcək.

Prioritet tətbiq olunan məktəblərin siyahısı:

Azərbaycan bölməsi üzrə üstünlük hüququ tətbiq olunan məktəblər

Tədrisi digər dillərdə aparılan bölmələr üzrə üstünlük hüququ tətbiq olunan məktəblər

Bakı Şəhəri üzrə Təhsil İdarəsi tərəfindən “Yaşıl dünya naminə həmrəylik ili”nə həsr olunmuş “Bütöv Azərbaycana ilk bahar gəlir” adlı bayram festivalı keçirilib.

Paytaxtdakı 229 nömrəli tam orta məktəbdə təşkil olunan festivalda Elm və Təhsil Nazirliyi yanında Məktəbəqədər və Ümumi Təhsil üzrə Dövlət Agentliyinin direktor müavini, Agentliyin Bakı Şəhəri üzrə Təhsil İdarəsinin (BŞTİ) müdiri vəzifəsini müvəqqəti icra edən Nərminə Hüseynova, millət vəkilləri Sadiq Qurbanov, Məlahət İbrahimqızı, İltizam Yusifov, Könül Nurullayeva, Səbinə Xasayeva, Elm və Təhsil Nazirliyinin Daxili nəzarət şöbəsinin müdir müavini Kamran İsmayılov, Nizami Rayon İcra Hakimiyyəti başçısının müavini İldırım Mehdiyev, şair Baba Vəziroğlu, BŞTİ-nin struktur bölmə rəhbərləri, Nizami Rayonu İcra Hakimiyyətinin nümayəndələri, məktəb direktorları, məktəbdənkənar təhsil müəssisələrinin rəhbərləri, müəllimlər və şagirdlər iştirak ediblər.

Öncə qonaqlar festival çərçivəsində keçirilən ağacəkmə aksiyasında iştirak ediblər.

Daha sonra Novruz adət-ənənələrini canlandıran və müxtəlif bölgələrimizi tərənnüm edən guşələrə baxış keçirilib.

Çıxış edənlər festival iştirakçılarını xalqımızın milli bayramı olan Novruz münasibətilə ürəkdən təbrik edib, firavanlıq və xoş günlər arzulayıblar. Bildirilib ki, digər illərdən fərqli olaraq bu il Novruz bayramı ərazilərinin tam suverenliyinə nail olmuş Azərbaycanda qeyd edilir. Uzun illər sonra bütöv Azərbaycanın Novruzu qeyd etməsini Ali Baş Komandan İlham Əliyevin böyük sərkərdəlik məharətinə, güclü iradəsinə və qətiyyətinə, müzəffər və yenilməz ordumuzun şücaətinə borcluyuq.

Qeyd olunub ki, BŞTİ-nin tabeliyindəki ümumi təhsil müəssisələrində xalqımızın qədim tarixini, milli adət və ənənələrini  gənc nəslə daha yaxından tanıtmaq, təbliğ etmək məqsədilə müxtəlif tədbirlər keçirilir. Bu istiqamətdə reallaşdırılan “Dəyərlərimizi qoruyaq!” layihəsi çərçivəsində təşkil olunan “Bütöv Azərbaycana ilk bahar gəlir” adlı bayram festivalı milli-mənəvi dəyərlərimizə, tariximizə, köklərimizə nə qədər bağlı olmağımızın bariz nümunəsidir.

 Tədbir iştirakçıları festivalın “Yaşıl dünya naminə həmrəylik ili”nə həsr olunmasını yüksək qiymətləndiriblər. Bildiriblər ki, şagirdlərin burada səsləndirdikləri mahnılar və şeirlər, həm də ətraf mühitin sağlamlaşdırılması, yaşıllıqların bərpası və artırılması ilə bağlı ötürülən gözəl mesajlardır.

Tədbirdə şagirdlər və Uşaq-Gənclər İnkişaf mərkəzlərinin dərnək üzvləri baharın təravətli nəfəsini özü ilə gətirən Novruz bayramına aid mahnılar ifa edib, yallı gedib, şeirlər səsləndirib, maraqlı səhnəciklər və digər özfəaliyyət bacarıqlarını nümayiş etdiriblər.

Sonda məktəbin həyətində bayram tonqalı qalanıb və qonaqlar şagirdlərlə birgə “Cəngi” sədaları altında dövrə vurublar.

    21 Fevral - Beynəlxalq ana dili günü münasibəti ilə “Ana dili millətin ən böyük sərvətidir” başlığı altında 4 “e” sinif şagirdlərinin iştirakı ilə kitabxanada tədbir keçirilmişdir. Tədbirdə şagirdlər xalqın inkişafının formalaşmasında dilin vacibliyindən söhbət açıb, insanın dünyagörüşünün genişlənməsində, mükəmməl təhsil almasında mühüm rol oynadığını bildirdilər. Bu bir həqiqətdir ki, hər bir dil özündə bir tarix yaşadır. Doğma Azərbaycan dili də bizim keçmişimiz, bu günümüz və sabahımızdır.

    Şagirdlər gündəlik həyatımızda başqa dillərdə deyil, öz dilimizdə olan sözlərin vacibliyini səhnəciklə göstərdilər. Bundan əlavə, klassik şeirimizin ölməz nümunələrini yaratmış şair Molla Pənah Vaqiflə Şah Qacarın tarixi dialoqunu böyük məharətlə təqdim etdilər.

    15.02.2024-cü il tarixdə kitabxanada 7 və 8-ci sinif şagirdlərinin iştirakı ilə görkəmli dramaturq Cəfər Cabbarlının hekayələrinin müzakirəsinə həsr olunmuş dəyirmi masa keçirildi.

    Tədbirdə əvvəlcə 20-ci əsr Azərbaycan ədəbiyyatının təkamül və təşəkkülündə müstəsna xidmətlər göstərmiş nasir, teatrşünas Cəfər Cabbarlının həyatından bəhs olundu. Daha sonra şagirdlər oxuduqları hekayələrin məzmunu, toxunulan məsələlər barədə fikirlərini bölüşdülər. Tədbirin gedişində məktəbin direktoru, direktor müavini, UBTR, ədəbiyyat müəllimləri və həmçinin valideyn mütaliə vərdişlərinin artırılmasının vacibliyini vurğulayıb, şagirdlərin hər zaman fəal iştirakını tövsiyə etdilər.