"Nağıllar aləminə səyahət"
220 nömrəli məktəb-lisey şagirdlərinin hazırladığı “Nağıllar aləminə səyahət” adlı xeyriyyə tamaşası nümayiş olunub.Bakı Şəhəri üzrə Təhsil İdarəsinin (BŞTİ) təşəbbüsü ilə Azərbaycan Dövlət Gənc Tamaşaçılar Teatrının səhnəsində nümayiş etdirilən tamaşa Azərbaycan xalq nağılları və dünya ədəbiyyatı nümunələri əsasında səhnələşdirilib.
Xeyriyyə tamaşasını elm və təhsil naziri Emin Əmrullayev, Azərbaycan Respublikası Prezidentinin Administrasiyasının Humanitar siyasət, diaspora, multikulturalizm və dini məsələlər şöbəsinin müdiri Fərəh Əliyeva, BŞTİ-nin müdiri Mehriban Vəliyeva, Elm və Təhsil Nazirliyinin müvafiq struktur bölmə rəhbərləri, millət vəkilləri, rayon icra hakimiyyətlərinin nümayəndələri, “YAŞAT” Fondunun müdir müavini Rəbiyyə Cəfərova və digər rəsmi şəxslər, media qurumlarının rəhbərləri, şəhid ailələrinin üzvləri, məktəb direktorları, məktəbəqədər təhsil müəssisələrinin rəhbərləri, məktəblilər izləyiblər.
Humanizm və ümumbəşəri dəyərlərin təbliğ olunduğu tamaşanın əsas məqsədi nağıl qəhrəmanlarının dili ilə dünya uşaqlarının sülh, əmin-amanlıq şəraitində yaşamaq istəyini, dostluğa və sülhə çağırış mesajlarını çatdırmaqdan ibarətdir.
Məktəblilərin ilk təşəbbüsü olan xeyriyyə tamaşasının nümayişindən öncə 220 nömrəli məktəb-lisey ansamblı üzvlərinin skripka və tarda canlı ifaları və məktəb-liseydə təhsil alan 1 nömrəli uşaq evinin şagirdlərinin rəsm əsərlərindən ibarət sərgisi nümayiş olunub.
Məktəblilərin xeyriyyə tamaşası haqqında fikirlərini bildirən BŞTİ müdiri Mehriban Vəliyeva qeyd edib ki, Gənc Tamaşaçılar Teatrının böyük səhnəsində Bakının kiçik yaşlı məktəblilərinin nümayiş etdirdikləri xeyriyyə tamaşası onların Vətən üçün həmrəy olduqlarını göstərməklə bərabər, həm də xeyriyyəçilik, yardımlaşma ənənəsinin təlqin edilməsi baxımından əhəmiyyətlidir. İdarə müdiri, həmçinin vurğulayıb ki, məktəblilərin peşəkar teatr səhnəsindəki çıxışı həm də onlara yaradıcılıq baxımından özünə inam hissi aşılayır.
Qeyd edək ki, inklüziv sinif şagirdlərinin də iştirak etdiyi tamaşadan əldə olunan vəsait “YAŞAT” Fonduna köçürülüb.
