Tariximizin şanlı səhifəsi
Xalqımızın azadlıq və müstəqillik mübarizəsi tarixinə qızıl hərflərlə həkk olunmuş 1918-ci il mayın 28-i hər bir Azərbaycan vətəndaşının milli qürur hissi duyduğu, arzularının çiçək açdığı bir gündür. Əsrlərlə azadlıq və müstəqillik arzusu ilə yaşayan Azərbaycan xalqı ötən əsrin əvvəllərində bu işıqlı may günündə arzusuna qovuşdu. Şərqdə ilk dəfə azad, demokratik, dünyəvi dəyərlərə söykənən müstəqil bir respublikanın yarandığı dünyaya bəyan edildi. Xalqımız 1918-ci il mayın 28-də çar Rusiyasının bir əsrdən artıq davam edən müstəmləkə əsarətindən azad oldu, Şərqin ilk demokratik respublikasının təməlini qoydu. Həmin gün Azərbaycan Milli Şurasının iclasında İstiqlal Bəyannaməsi qəbul edildi. Azərbaycan Xalq Cümhuriyyətinin qurulması XX əsrdə xalqımızın həyatında yeni bir mərhələ, tarixi hadisə oldu. 220 nömrəli-məktəb liseyin 5 “E” sinif şagirdləri sinif rəhbərləri Musyeva Aygün və tarix müəllimləri Nəsibova Şərqiyyənin təşkilatçılığı ilə “Tariximizin şanlı səhifəsi” adlı virtual açıq dərs keçirdilər. Dərsdə tariximizin qüruru olan 28 May-Respublika gününün əhəmiyyətindən və xüsusiliyindən söz açıldı. Şagirdlər vətənpərvərlik motivlərində olan şeir, mahnı ifa etdilər.
