Mübariz İbrahimovun doğum günü
7 Fevral Azərbaycanın Milli Qəhrəmanı Mübariz İbrahimovun doğum günüdür. Mübariz İbrahimov 1988-ci il fevralın 7-də Biləsuvar rayonunun Əliabad kəndində anadan olub. 1994-cü ildə şəhid M.Piriyev adına Əliabad kənd orta məktəbinin 1-ci sinfinə daxil olaraq 2005-ci ildə orada orta təhsilini başa vurub.
Həmin il həqiqi hərbi xidmətə çağrılıb. Əsgəri xidmətini Daxili Qoşunların "N" saylı hərbi hissəsinin Xüsusi Təyinatlı Bölüyündə keçirib. Həqiqi hərbi xidmətini 2007-ci ildə çavuş rütbəsində başa vurub.
Bir müddət mülki işlərdə işlədikdən sonra 2009-cu ilin avqust ayında yenidən gizir rütbəsində hərbi xidmətdə çalışmağa başlayıb. Bir müddət sonra öz arzusu ilə cəbhə bölgəsindəki hərbi hissələrdən birində xidmət etməyə başlayıb.
19 iyun 2010-cu il tarixində gecə saat 23:30 radələrində gizir Mübariz İbrahimov təkbaşına iki ordu arasındakı bir kilometrlik minalanmış sahəni keçir. Ermənistan silahlı qüvvələrinin çox sayda əsgər və zabitini gözlənilməz birinci həmlədə məhv edir. Sonra isə düşmənin öz silahlarından özünə qarşı istifadə edərək 5 saat onlarla təkbətək döyüşur. Düşməni ağır itkilərə məruz qoyur, onların zəif cinahlarını üzə çıxarır. Azərbaycan döyüşçüsü səhər saatlarında qeyri-bərabər döyüşdə qəhrəmancasına şəhid olur.
Azərbaycan Prezidenti İlham Əliyev Azərbaycan Milli Ordusunun giziri Mübariz Ağakərim oğlu İbrahimova "Azərbaycanın Milli Qəhrəmanı" adının (ölümündən sonra) verilməsi barədə sərəncam imzalayıb. Şəhid gizirə bu ad Azərbaycan Respublikasının müstəqilliyinin və ərazi bütövlüyünün qorunub saxlanılmasında müstəsna xidmətinə və göstərdiyi rəşadətə görə verilib.
Şəhid Mübariz İbrahimovun ailəsinə son məktubu
"Canım atam və anam. Məndən sarı darıxmayın. İnşallah, cənnətdə görüşəcəyik. Mənim üçün bol-bol dua edin. Vətənin dar günündə artıq ürəyim dözmür. Allaha xatir bunu etməliyəm. Ən azından ürəyim sərinlik tapar. Şəhid olanadək bu şərəfsizlərin üzərinə gedəcəyəm. Şəhid olsam - ağlamayın. Əksinə, sevinin ki, o mərtəbəyə yüksəldim. Allaha ibadətlərinizi dəqiq yerinə yetirin. Çoxlu sədəqə verin. Seyid nəvəsi olaraq bunu etməliyəm. Allah böyükdür. Vətən sağ olsun. Oğlunuz Mübariz. Haqqınızı halal edin".
Yaşasaydı bu il 35 yaşı olacaqdı qəhrəmanımızın.
Bu gün Xətai rayonu Ə.Əliyev adına 204 nömrəli məktəbdə Mübariz İbrahimovun adını daşıyan 5ç sinif şagirdlərinin iştirakı ilə Mübariz İbrahimovun 35-ci il dönümünə həsr olunmuş tədbir keçirildi.
Tədbir Azərbaycanın Dövlət himni ilə başladı və şəhidlərin əziz xatirəsi 1 dəqiqəlik sükutla yad edildi.5ç sinif şagirdlərinin ifasında səsləndirilən Mübarizin həyat yolu onlarda vətənpərvərlik hissini daha da gücləndirdi.
Yuxarı sinif şagirdlərinin hazırladığı kompozisiyada Mübariz İbrahimovun döyüş səhnəsi canlandırıldı.
9d sinif şagirdi Fərid Fərruxlunun tarda ifa etdiyi "Muğam", 10ç sinif şagirdi Quliyeva Aysunun ifa etdiyi "Azərbaycan" mahnısı, 5ç sinif şagirdi Salmanlı Dənizin “Mübariz” şeiri, Babayev Rəsulun ifasında “Zəfər marşı” səsləndirildi.
Məktəbimizin məzunu Qarabağ qazisi, Fuad şagirdlərə 2-ci Qarabağ müharibəsi haqqında söhbətləri şagirdlərin vətənpərvərlik ruhunu aşıladı.
Sonda məktəbin direktoru Rafael Mehdiyev çıxış edərək, şagirdlərə və tədbirin təşkilatında zəhməti olan 5ç sinfinin sinif rəhbəri Qiyafət Fərruxovaya, dərnək rəhbəri Nigar Quliyevaya təşəkkürünü bildirdi.Tədbir iştirakçıları “Fəxri Fərmanla” təltif olundu.
