Məktəbimizin şagird və müəllim kollektivi xalqımızın and yeri olan "Şəhidlər xiyabanı"na ziyarət edir.
20 Yanvar Azərbaycan tarixində təkcə faciə deyil, Azərbaycanın istiqlal yolunun ilk zirvəsi, milli məfkurəmizin azadlıq istəyinin oyanış günüdür. Bu, uzun illər sovet imperiyasının əsarətində yaşayan xalqın azadlıq səsini ucaltdığı, öz suverenliyi uğrunda cəsarət nümayiş etdirdiyi şərəfli bir tarixdir. Bu tarix həm də kimin kim olduğunu sübut edən növbəti imtahan idi. Bu il xalqımız 20 Yanvar hadisələrinin 27 - ci ildönümünü qeyd edir, igid övladlarının fədakarlığını məhəbbətlə xatırlayır, onların əziz xatirəsini böyük ehtiramla yad edir. Bakının ən möhtəşəm məkanında Vətən uğrunda canlarını qurban vermiş mərd, igid oğul və qızlarımızın uyuduğu Şəhidlər xiyabanı xalqımız üçün müqəddəs bir and yerinə, milli iradəmizin şanlı-şərəfli bir salnaməsinə çevrilib. Şəhidlərimiz və Şəhidlər xiyabanı azadlığımızın, müstəqilliyimizin, milli iradəmizin simvolu kimi bundan sonrakı nəsillərə də bir qürur mənbəyi olacaqdır. Yanvarın 16-da məktəbin tərbiyə işləri üzrə direktor müavini Fatma İbrahimova , Uşaq Birliyinin Rəhbəri Sahibə Adıgözəlova, məktəbin şagirdləri və valideynlər Şəhidlər xiyabanını ziyarət etdilər. Vətən uğrunda canından keçən şəhidlərin məzarlarına qərənfil dəstələri düzdülər.
